У нядзелю 30 жніўня ўвечары ў мінскім Свята-Духавым кафедральным саборы епіскап Веніямін, прызначаны Мітрапалітам Мінскім і Заслаўскім, Патрыяршым Экзархам усяе Беларусі, узначаліў малебен з акафістам Успенню Найсвяцейшай Багародзіцы і малітвай за беларускі народ.
Адначасова падобныя набажэнствы з малітвай за Бацькаўшчыну па благаслаўленні епіскапа Веніяміна адбываліся ва ўсіх праваслаўных храмах Беларусі.
Католікі мінскай парафіі святога Сымона і святой Алены ў Чырвоным касцёле таксама духоўна далучыліся ў малітве да нашых суайчыннікаў, праваслаўных братоў і сясцёр.
У набажэнстве ў галоўнай праваслаўнай святыні беларускай сталіцы ўзялі ўдзел шматлікія вернікі, якія адгукнуліся на заклік свайго пастыра і праз заступніцтва Багародзіцы маліліся аб міры і згодзе на беларускай зямлі.
Як перадае партал Беларускай Праваслаўнай Царквы Сhurch.by, у прамоўленым на заканчэнне супольнай малітвы казанні епіскап Веніямін заўважыў, што малітва можа здавацца сучаснаму няверуючаму чалавеку чымсьці нязначным, але насамрэч яна вельмі дзейсная.
«Малітва — гэта самая цяжкая праца, але і самая плённая», — падкрэсліў праваслаўны іерарх, нагадаўшы пра асаблівае значэнне малітвы псальмамі са Святога Пісання.
Новапрызначаны Патрыяршы Экзарх усяе Беларусі заклікаў вернікаў Праваслаўнай Царквы шукаць перадусім духоўныя прычыны трывожных і неспакойных падзей, якія адбываюцца ў нашым грамадстве.
«Што будзе далей? — задаў рытарычнае пытанне епіскап Веніямін і даў на яго бясспрэчны духоўны адказ: —
Далей будзе тое, што дасць Бог. Што дасць Бог па нашай малітве».
Праваслаўны іерарх дадаў, што цяпер за Беларусь моляцца таксама хрысціяне ў розных краінах свету. Тым больш беларускія вернікі павінны з’яднацца ў трывалай малітве да Бога, каб такім чынам дапамагчы сваёй Бацькаўшчыне.
«І будзе водгук з Неба! Найсвяцейшая Багародзіца, дапамагай нам!» — сказаў на заканчэнне казання новапрызначаны кіраўнік Беларускай Праваслаўнай Царквы.
