15 і 16 ліпеня ў парафіі Маці Божай Шкаплернай у Мядзелі прайшла адпустовая ўрачыстасць.
У вігілію галоўнага кармэліцкага свята ў парафіяльным касцёле адбылася святая Імша і заканчэнне навэнны да Маці Божай Шкаплернай.
Пазней вернікі парафіі, а таксама пілігрымы і госці сабраліся ля ўваходнай брамы мядзельскай Кальварыі, каб удзельнічаць у набажэнстве Крыжовага шляху. Праходзячы па ўзгорках, далінах і лясных сцяжынках, яны слухалі разважанні паасобных стацый і вучыліся разам з Езусам і Марыяй несці крыжы свайго штодзённага жыцця.
16 ліпеня, ва ўрачыстасць Найсвяцейшай Панны Марыі з гары Кармэль, у парафіяльнай святыні адбылася Імша ў гонар Багародзіцы і працэсія вакол касцёла.
Цэлебрацыю ўзначаліў і прамовіў гамілію а. Стэфан Пупейка OFM, які нясе служэнне ў Слуцку.
У гаміліі святар нагадаў пра вялікае значэнне шкаплера як знаку апекі і абароны Багародзіцы ў нашым жыцці, а таксама пра асабістае сяброўства з Марыяй у выбары, даверы і крочанні шляхам паклікання.
