2 ліпеня Мітрапаліт Мінска-Магілёўскі арцыбіскуп Тадэвуш Кандрусевіч прыбыў у Нацыянальны санктуарый у Будславе на штогадовую ўрачыстасць Маці Божай Будслаўскай, дзе адразу атрымаў салодкі падарунак ад вернікаў з Нарачы.
Хоць сёлетні агульнабеларускі фэст у Будславе з-за складанай эпідэміялагічнай сітуацыі быў перанесены на нявызначаны час, і ўрачыстасць праходзіла ў больш сціплым парафіяльным фармаце, аднак яшчэ адна традыцыя аказалася мацнейшай за пандэмію.
Учора мы ўжо пісалі пра тое, што Будслаў 2020 не застаўся без пілігрымаў: нягледзячы на адмену арганізаваных пілігрымак, вернікі ў індывідуальным парадку ішлі пешкі і ехалі ў Нацыянальны санктуарый на роварах, байках і на асабістым транспарце.
Вернікі парафіі святога апостала Андрэя ў Нарачы (Мядзельскі дэканат) вырашылі правесці духоўную пілігрымку. У дзень урачыстасці прадстаўнікі нарачанскай парафіі прыбылі ў Будслаў і прывезлі да Маці Божай малітоўныя інтэнцыі, сабраныя ў касцёле і праз інтэрнэт.
Не забыліся яны захапіць таксама традыцыйны кошык трускавак, якім сустрэлі ў Нацыянальным санктуарыі арцыбіскупа Тадэвуша Кандрусевіча.
Удзячны нарачанцам за памяць і салодкі падарунак, арцыпастыр у сваю чаргу частаваў іншых смачнымі ягадамі.
