28 чэрвеня санктуарый Маці Божай Валадаркі Азёраў у Браславе наведалі ўдзельнікі мотапілігрымкі з Лагішына.
Пра гэта паведамляе сайт санктуарыя Waladarka.by.
Трое святароў здзяйсняюць прыватную пілігрымку ў Будслаў, наведваючы пры гэтым мясціны ў Беларусі, дзе асаблівым чынам ушаноўваецца Маці Божая.
Ксёндз Павел Ярашэвіч, ксёндз Юрый Медушэўскі, ксёндз Юзаф Парфяновіч вырушылі ў дарогу 27 чэрвеня. А паколькі на матацыкле да Будслава можна даехаць за дзень, то святары вырашылі зрабіць пілігрымку больш працяглай і наведаць усе марыйныя санктуарыі Беларусі.
«Наш шлях пралягае ледзь не праз усю Беларусь, каб такім чынам мы маглі ахапіць малітвай усю нашу Бацькаўшчыну», — распавёў браслаўскім вернікам кс. Юрый Медушэўскі.
Святары моляцца ў санктуарыях, збіраюць інтэнцыі, у якіх таксама моляцца падчас дарогі і якія завязуць у Будслаў. Свае просьбы да Маці Божай Будслаўскай перадалі і вернікі браслаўскай парафіі.
