Дабрачыннае таварыства Caritas Мінска-Магілёўскай архідыяцэзіі працягвае дастаўляць дапамогу медыкам і работнікам сацыяльных устаноў.
На працягу тыдня дапамога дастаўлялася ў райцэнтры Мінскай і Магілёўскай вобласці.
Па-ранейшаму ў сацыяльных установах існуе вялікая патрэба ў сродках індывідуальнай аховы, і Касцёл усімі сіламі імкнецца дапамагаць патрабуючым.
Супрацоўнікі і валанцёры Caritas перадалі ахоўныя шчыткі, медыцынскія маскі, у тым ліку і шматразовыя, пашытыя валанцёрамі каталіцкага таварыства, камбінезоны, пальчаткі, бахілы, сродкі дэзінфекцыі, рэспіратары ІІ і ІІІ класа, халаты, шапачкі, бескантактныя тэрмометры, дазатары з вадкасцю для іх, медыцынскія сурвэткі, дэзінфекцыйныя дыванкі і спецыяльныя сродкі для іх, перасоўны бактэрыцыдны апрамяняльнік, флаўметры, пульсаксіметр.
Гэтым разам дапамогу атрымалі Свірскі псіханеўралагічны дом-інтэрнат, Мядзельская ЦРБ і Мядзельскі ТЦСАН, Крычаўская ЦРБ, Клімавіцкая ЦРБ, Чэрыкаўскі ТЦСАН, Касцюковіцкі ТЦСАН, Быхаўская ЦРБ, Асіповіцкая ЦРБ і Асіповіцкі ТЦСАН, Слаўгарадскі ТЦСАН, Бялыніцкая ЦРБ, Шклоўская ЦРБ і Шклоўскі ТЦСАН.
Прадуктовыя наборы і сродкі індывідуальнай абароны былі раздадзены таксама людзям з інваліднасцю ў Мінску.
Аказанне гэтай дапамогі, такой патрэбнай у цяперашні складаны час, стала магчымым дзякуючы агульнабеларускаму збору сродкаў, які пастаянна вядзецца ў Каталіцкім Касцёле, падтрымцы Міністэрства замежных спраў Польшчы («Польская дапамога»), Caritas дыяцэзіі Лінца (Аўстрыя) і мясцовых мецэнатаў.
