14 чэрвеня ў парафіі святых апосталаў Пятра і Паўла ў Іўі адбылася працэсія Божага Цела, да якой тутэйшыя вернікі падрыхтавалі традыцыйныя дываны з кветак.
Як паведамляе партал Grodnensis.by, працэсіі папярэднічала святая Імша ў касцёле з удзелам парафіянаў.
Згодна з санітарнымі рэкамендацыямі, сёлетняя працэсія праходзіла не вуліцамі Іўя, а на тэрыторыі вакол парафіяльнай святыні. Дождж, які пайшоў напачатку працэсіі, не напалохаў вернікаў.
Як заўсёды, нават у цяперашні час былі падрыхтаваны чатыры алтары з ужо вядомымі на ўсю Беларусь іўеўскімі дыванамі з кветак.
Каб стварыць такую арт-пляцоўку, трэба было прыкласці нямала сіл і фантазіі.
Адзін з алтароў быў прысвечаны св. Яну Паўлу ІІ, 100-я гадавіна нараджэння якога адзначалася сёлета.
