Паколькі з-за пандэміі каранавірусу правядзенне катэхезы ў многіх парафіях было прыпынена, узнікла неабходнасць дыстанцыйнай формы навучання для тых, хто цяпер не мае магчымасці наведваць заняткі пры касцёле.
Катэхетычная секцыя, якая дзейнічае ў межах Камісіі па справах каталіцкай адукацыі і катэхезы пры Канферэнцыі Каталіцкіх Біскупаў у Беларусі, вырашыла стварыць цыкл відэакатэхез, каб працягваць заняткі па рэлігіі анлайн.
Перадусім гэта катэхезы, прысвечаныя святым сакрамэнтам, якія ўваходзяць у праграму другога года падрыхтоўкі да Першай святой Камуніі.
Такім чынам ужо цяпер на нашым партале дзеці могуць працягваць анлайн падрыхтоўку да сустрэчы з Хрыстом у Эўхарыстыі, каб, як толькі дазволіць эпідэміялагічная сітуацыя, яны годна ўпершыню прынялі Езуса ў свае сэрцы.
Хто ж стварае гэтыя відэакатэхезы для нашых дзетак? Вядома, у Касцёла на Беларусі няма сваёй уласнай відэастудыі, таму падрыхтоўкай відэакатэхез самастойна займаюцца святары, сёстры законныя і катэхеты з розных парафій.
Адна з катэхез, прысвечаная сакрамэнту пасвячэння, была знятая адказнымі за катэхізацыю ў мінскай парафіі святога Яна Евангеліста і святога Максімільяна Марыі Кольбэ. Аўтарамі ідэі, сцэнарыстамі і галоўнымі героямі роліка сталі сястра Кляра Волчак CSFN і ксёндз Уладзімір Марушэўскі SChr. У відэалекцыі таксма зняліся многія парафіяне — як дарослыя, так і дзеці.
Для гэтага няма патрэбы ў прафесійных акторах і дарагім абсталяванні: пры жаданні з Божай дапамогай практычна ў кожнай парафіі можна падрыхтаваць сваю відэакатэхезу, якой потым скарыстаюцца таксама іншыя.
Неабходна толькі ўзгадніць тэму з Катэхетычнай секцыяй. Акрамя таго, пры стварэнні відэакатэхез непажадана карыстацца фрагментамі чужых фільмаў і відэа, каб не ўзнікала пытанняў з аўтарскім правам.
Традыцыйна ў маі шмат дзе адбываюцца прэзбітэрскія і дыяканскія пасвячэнні. Адпаведна на гэты ж месяц прыпадаюць і многія гадавіны пасвячэнняў. Таму менавіта цяпер прагляд відэакатэхезы пра гэты сакрамэнт можа стаць не толькі для дзяцей, але і для кожнага з вернікаў добрай нагодай задумацца пра вялікі дар і таямніцу — святарства.
