Пошук

06.05.2020 16:44   Тэкст і фота: Андрэй Юхнік / Catholic.by

6 мая студэнты VI курса Міждыяцэзіяльнай вышэйшай духоўнай семінарыі ў Гродне афіцыйна завяршылі сваю семінарыйную фармацыю.

Раніцай у капліцы семінарыі адбылася ўрачыстая святая Імша, якую цэлебраваў біскуп Гродзенскі Аляксандр Кашкевіч разам з дапаможным біскупам Юзафам Станеўскім, выхавацелямі і выкладчыкамі духоўнай навучальнай установы.

Гэтая Імша стала для дыяканаў апошняй у сценах семінарыі ў якасці студэнтаў — з гэтага часу яны з’яўляюцца выпускнікамі Alma Mater.

Выпускнікі сімвалічна падрыхтавалі літургію і споўнілі ў апошні раз функцыі міністрантаў: прыслугоўвалі каля алтара, чыталі літургчінае чытанне, спявалі псальм, званілі ў званкі — усё тое, што яны рабілі, яшчэ будучы семінарыстамі.

З гаміліяй да прысутных звярнуўся біскуп Аляксандр. Іерарх узгадаў папулярнасць Каміно — пілігрымавання ў Сант'яга-дэ-Кампастэла. «Хоць дарога нялёгкая, але з кожным разам на гэты шлях збіраецца ўсё больш пілігрымаў, — адзначыў біскуп. — Кожны з іх прагне пачуць голас Бога або проста пераацаніць сваё жыццё. Адзін з пілігрымаў паставіў пытанне самому сабе пасля пройдзенага шляху: “Можа, не дарога з’яўляецца цяжкай, а цяжкасці з’яўляюцца маёй дарогай?”»

«Езус называе сябе дарогаю, праўдаю і жыццём. Гэтыя словы акрэсліваюць ваш шлях і мэту. Вельмі трапныя словы сённяшняга рэфрэну псальма: па ўсёй зямлі расходзіцца іх голас. Якуб і Філіп нават не ўяўлялі сабе, што будуць вядомыя ўсяму свету ў 2020 годзе. Іх мучаніцкая смерць — гэта прыклад і заклік да трывання ў Касцёле і вернасці Божаму пакліканню.

Ніхто не ведае, як будзе выглядаць ваша святарства, але памятайце, што вы павінны заўсёды ісці за Хрыстом і выбіраць Яго ў сваім жыцці»,

— з такімі словамі звярнуўся да дыяканаў-выпуснікоў іерарх.

Напрыканцы Імшы выпускнікі падзякавалі біскупам і выхавацелям за час фармацыі і ўручылі памятны фотакалаж свайго выпуску.

Абноўлена 06.05.2020 16:49
Пры выкарыстанні матэрыялаў Catholic.by спасылка абавязковая. Калі ласка, азнаёмцеся з умовамі выкарыстання

Дарагія чытачы! Catholic.by — некамерцыйны праект, існуе за кошт ахвяраванняў і дабрачыннай дапамогі. Мы просім падтрымаць нашу дзейнасць. Ці будзе наш партал існаваць далей, у значнай ступені залежыць ад вас. Шчыра дзякуем за ахвярнасць, молімся за ўсіх, хто нас падтрымлівае.

. . . . . . . . . . . . . . . . . . . . . . . . . . . . . . . . . . . . . . . . . . . . . . . . . . . . . . . . . . . . .
Папа Францішак

Бог заўсёды чакае нас.
Ён ніколі не губляе надзеі і заўсёды прабывае побач.