22 красавіка вернікі каталіцкай парафіі святога Францішка ў Салігорску перадалі ў мясцовы Цэнтральны раённы шпіталь пасцельную бялізну.
Натхнёныя духам хрысціянскай любові і міласэрнай дапамогі бліжнім, салігорскія католікі пацікавіліся ў аддзяленні рэанімацыі, якая дапамога найбольш патрэбная ў сённяшнія складаныя часы. Высветлілася, што ўстанова аховы здароўя мае патрэбу ў пасцельнай бялізне, асабліва ў навалках.
Закупіўшы на сабраныя ў касцёле сродкі частку бялізны ў мясцовым універмагу, рэшту парафіяне вырашылі пашыць самі.
Супрацоўнікі крамы «Салігорск» дапамаглі выбраць патрэбную тканіну і размералі яе, каб зберагчы час для раскрою і пашыву.
Такім чынам, парафіяльная супольнасць горада адказала на Зварот Канферэнцыі Каталіцкіх Біскупаў у Беларусі аб зборы ахвяраванняў на барацьбу з пандэміяй каранавірусу і далучылася да гэтай пачэснай справы.
