8 красавіка мы паведамлялі, што сёлета ад благаслаўлення велікодных страваў у сталічных парафіях устрымаюцца толькі біскупы, а святары будуць благаслаўляць традыцыйныя стравы ў адпаведнасці з вызначаным у паасобных касцёлах раскладам.
Паколькі некаторыя рэсурсы падаюць скажоную інфармацыю адносна благаслаўлення велікодных страваў у Мінску, партал Каталіцкага Касцёла ў Беларусі Catholiс.by афіцыйна паведамляе, што ад удзелу ў гэтым святочным абрадзе ўстрымліваюцца сёлета ТОЛЬКІ БІСКУПЫ.
Благаслаўленне велікодных страваў у сталічных парафіях адбываецца згодна з вызначаным ксяндзамі пробашчамі раскладам, абвешчаным вернікам.
Разам з тым у сувязі з надзвычайнай эпідэміялагічнай сітуацыяй, згодна са спецыяльным распараджэннем арцыбіскупа Тадэвуша Кандрусевіча, вернікі могуць здзейсніць абрад благаслаўлення традыцыйных страваў дома, непасрэдна перад святочным велікодным снеданнем.
