Старшыня Канферэнцыі Каталіцкіх Біскупаў у Беларусі арцыбіскуп Тадэвуш Кандрусевіч скіраваў віншаванне новаабранаму кіраўніку епіскапату Германіі біскупу Лімбургскаму Георгу Бэтцінгу, які 2 сакавіка змяніў на гэтай пасадзе кардынала Рэйнхарда Маркса.
«Ад імя Канферэнцыі Каталіцкіх Біскупаў у Беларусі прыміце самыя сардэчныя зычэнні з нагоды Вашага абрання Старшынёй Канферэнцыі Біскупаў Германіі.
Каталіцкі Касцёл у Беларусі ўдзячны за дапамогу, якую нам аказваюць нямецкія католікі. Без яе немагчыма было б уявіць сабе адраджэнне нашага Касцёла пасля трох пакаленняў ганенняў.
Няхай святы Баніфацый, нябесны апякун Германіі, выпрошвае Вам у Бога патрэбныя ласкі для мудрага кіравання нямецкім Касцёлам у наш складаны час, калі неабходна імгненна чытаць выклікі часу і на іх адказваць.
Запэўніваю ў малітве ў інтэнцыі служэння Вашай Эксцэленцыі як Касцёлу ў Германіі, так і паўсюднаму Касцёлу, і выказваю надзею на далейшае плённае супрацоўніцтва паміж нашымі епіскапатамі», — напісаў Старшыня Канферэнцыі Каталіцкіх Біскупаў у Беларусі Мітрапаліт Мінска-Магілёўскі арцыбіскуп Тадэвуш Кандрусевіч свайму новаабранаму нямецкаму калегу.
Біскупу Георгу Бэтцінгу 58 гадоў, ён паходзіць з Рэйнланд-Пфальца, зямлі ў паўднёва-заходняй частцы Германіі. У дзяцінстве і юнацтве быў міністрантам, спяваў у касцёльным хоры і граў на аргане. Пасля заканчэння сярэдняй школы паступіў у духоўную семінарыю. Вывучаў філасофію і тэалогію ва ўніверсітэтах Трыра і Фрайбурга. Пасля абароны дактарату стаў рэктарам Трырскай вышэйшай духоўнай семінарыі. Ён быў адным з арганізатараў пілігрымкі да найкаштоўнейшай рэліквіі катэдры ў Трыры — тканай тунікі Езуса, якая ў 2012 годзе была выстаўлена ў святыні ўпершыню з 1996 года.
Быў прызначаны біскупам Лімбургскім у 2016 годзе. Біскупскае пасвячэнне прыняў з рук Мітрапаліта Кёльнскага арцыбіскупа Райнера Вёлькі.
