![](/3/images/news/2019/12/2019-12-31-hajsy_vystava_5.jpg)
29 снежня ў санктуарыі Маці Божай Валадаркі Азёраў у Браславе адкрылася выстава «Хайсы — віцебскія Курапаты», якая распавядае жудасную праўду пра рэпрэсіі камуністычнага рэжыму на Віцебшчыне.
Як паведамляе сайт санктуарыя Waladarka.by, убачыць выставу можна на працягу двух тыдняў.
Выстава была адкрыта ў канцы кастрычніка ў Віцебску, а потым па благаслаўленні біскупа Віцебскага Алега Буткевіча экспанавалася ў Полацку і Глыбокім. Цяпер з яе матэрыяламі могуць пазнаёміцца і жыхары Браслава.
Падчас адкрыцця выставы яе прадставілі арганізатар Ян Дзяржаўцаў і ксёндз Вячаслаў Барок.
Ксёндз Вячаслаў адзначыў, што ўсяго ў Беларусі налічваецца каля 100 падобных месцаў знішчэння камуністамі мірных жыхароў. Паводле інфармацыі даследчыка Ігара Кузняцова, у Беларусі было рэпрэсавана каля 1 мільёна 600 тысяч чалавек, а забіта з іх каля 377 тысяч.
«Хайсы — гэта сімвал знявечанасці, параненасці Беларусі, нашага народа, нашай памяці, таксама нашага Касцёла», — адзначыў святар. — У касцёле гэтая выстава адбываецца дзеля таго, каб праз падачу гэтай інфармацыі мы маглі аздаравіць нашую памяць.<…>
Сёння, калі мы робім гэтую выставу, калі дакранаемся да гэтай гістарычнай праўды, то не дзеля таго, каб, даведаўшыся прозвішчы катаў, ім адпомсціць, а дзеля таго, каб мы, назваўшы зло па імені, маглі ад яго адвярнуцца, каб маглі за гэтае зло пакаяцца. Мы хочам ад гэтага зла адвярнуцца і спрабаваць будаваць лепшую будучыню.
Як кажа Хрыстус у Евангеллі, пазнайце праўду, і праўда вызваліць вас. І гэтая выстава спрыяе таму, каб мы маглі пазнаць гістарычную праўду, каб гэтая праўда дакранулася да нашых сэрцаў і каб праз гэта Бог дазволіў нам, дзецям ахвяраў і катаў, знайсці паяднанне паміж сабой».
Ян Дзяржаўцаў у сваім выступе распавёў пра гісторыю адкрыцця месца сталінскіх рэпрэсій пад Віцебскам, пра працу ініцыятыўнай групы па стварэнні мемарыялу. Ён адзначыў, што на Браслаўшчыне было расстраляна каля 200 асоб.