![](/3/images/news/2019/12/2019-12-12-staneuski_wsd_5.jpg)
Раніцай 11 снежня ў капліцы Міждыяцэзіяльнай вышэйшай духоўнай семінарыі ў Гродне дапаможны біскуп Гродзенскай дыяцэзіі Юзаф Станеўскі цэлебраваў святую Імшу падзякі ў 25-ю гадавіну дыяканскага пасвячэння.
Як паведаміў партал Grodnensis.by, усе прысутныя на Эўхарыстыі выхавацелі і семінарысты далучыліся да падзякі Богу за дар паклікання і дар паўнаты святарства для біскупа Юзафа.
![](/3/images/news/2019/12/2019-12-12-staneuski_wsd_7.jpg)
8 снежня 1994 года ў гродзенскай катэдры біскуп Аляксандр Кашкевіч удзяліў дыяканскае пасвячэнне студэнтам Гродзенскай семінарыі: Юзафу Станеўскаму, Юзафу Ганьчыцу, Антонію Клімантовічу, Яну Крэмісу і Андрэю Бародзічу.
Гэта было першае пасвячэнне семінарыстаў у гісторыі гродзенскай Alma Mater з часу яе заснавання.
Рэкалекцыі перад прыняццем сакрамэнту пасвячэння для тагачасных кандыдатаў праходзілі з 1 па 7 снежня ў Ішчалне (Шчучынскі дэканат), правёў іх ксёндз прэлат Вінцэнт Лісоўскі. Аб рэкалекцыях засталася памятка — абразік з подпісам ксяндза Вінцэнта, які да сённяшняга дня захаваў біскуп Юзаф Станеўскі ў сваім брэвіярыі. З пасвячэння дыяканату біскуп захаваў і фотаздымкі.
«Пайшоў тады зрабіць гэтыя фотаздымкі ў атэлье. Дык у мяне спыталі: „А што гэта: вы ў жмуркі, лежачы, гуляеце?“ Тады яшчэ не разумелі гэтага», — прыгадаў з усмешкай біскуп.
![](/3/images/news/2019/12/2019-12-12-staneuski_wsd_10.jpg)
Юбіляр дадаў, што гадавіну дыяканскага пасвячэння зазвычай ніхто не адзначае, але, перш за ўсё, дыяканат з’яўляецца першай і важнай ступенню пасвячэння, а таксама з моманту прыняцця дыяканату свецкі чалавек становіцца духоўным.
У наш час значэнне гэтага ўстаноўленага Апосталамі інстытута ва ўсім Касцёле паступова адраджаецца.
Калі да нядаўняга часу дыяканат быў толькі ступенню перад прэзбітэрскім пасвячэннем, сёння сталыя дыяканы, як і ў апостальскія часы, у многіх краінах нясуць уласцівае ім служэнне. Таксама і каталіцкія біскупы Беларусі вырашылі адрадзіць у нашай краіне служэнне сталых дыяканаў.
![](/3/images/news/2019/12/2019-12-12-staneuski_wsd_1.jpg)