![](/3/images/news/2019/11/10725/2019-11-22-kalinouski-016-jan.jpg)
22 лістапада ў Вільні прайшла цырымонія дзяржаўнага перапахавання нацыянальнага героя Беларусі, Літвы і Польшчы Кастуся Каліноўскага і іншых удзельнікаў вызвольнага паўстання 1863–1864 гг. У цырымоніі ўзяў удзел Старшыня Канферэнцыі Каталіцкіх Біскупаў у Беларусі арцыбіскуп Тадэвуш Кандрусевіч, Мітрапаліт Мінска-Магілёўскі.
Арцыбіскуп Кандрусевіч узначаліў на перапахаванні беларускую касцёльную дэлегацыю, у якую ўвайшлі таксама Апостальскі візітатар для грэка-католікаў Беларусі архімандрыт Сяргей Гаек, пяць святароў лацінскага абраду і трое грэка-каталіцкіх прэзбітэраў.
![](/3/images/news/2019/11/10725/2019-11-22-kalinouski-017-jan.jpg)
Падчас працаў па ўмацаванні схілаў гары Гедыміна ў Вільні, якія вяліся са студзеня 2017 года, былі выпадкова знойдзены пахаванні. У выніку праведзеных даследванняў пацвердзілася прыналежнасць знойдзеных парэшткаў Кастусю Каліноўскаму і іншым удзельнікам вызвольнага паўстання пад яго кіраўніцтвам, якія былі пакараныя смерцю царскімі сатрапамі на Лукішскай плошчы.
У выніку далейшых пошукаў былі выяўлены парэшткі дваццаці кіраўнікоў і ўдзельнікаў паўстання, якія былі з дзяржаўнымі пашанамі перапахаваныя на могілках Роса ў Вільні.
У цырымоніі дзяржаўнага перапахавання ўзялі ўдзел прэзідэнт Літвы Гітанас Наўседа і прэзідэнт Польшчы Анджэй Дуда, а таксама прадстаўнічая дэлегацыя Беларусі на чале з віцэ-прэм’ерам Ігарам Петрышэнкам.
![](/3/images/news/2019/11/10725/2019-11-22-kalinouski-007-jan.jpg)
Раніцай адбыўся вынас трунаў з парэшткамі ўдзельнікаў паўстання з унутранага двору Палаца Вялікіх Князёў Літоўскіх на плошчу перад віленскай катэдрай, пасля чаго яны былі ўнесены ў віленскую катэдральную базыліку святога Станіслава і святога Уладзіслава. На працягу больш як гадзіны ў галоўным касцёле Віленскай архідыяцэзіі працягвалася грамадзянскае развітанне. У гэты час у катэдру прыбылі нашы шматлікія суайчыннікі, а таксама афіцыйныя асобы і замежныя дэлегацыі.
Апоўдні пры трунах з парэшткамі паўстанцаў распачалася святая Імша, цэлебрацыю якой узначаліў арцыбіскуп Мітрапаліт Віленскі Гінтарас Грушас з удзелам духавенства з Літвы, Польшчы і Беларусі.
На плошчы перад катэдрай была арганізавана відэатрансляцыя для вернікаў, якія не змаглі трапіць у святыню, уваход куды быў абмежаваны.
На заканчэнне літургіі з кароткаю прамоваю да прысутных звярнуўся арцыбіскуп Юзаф Гуздэк, галоўны капелан Войска польскага.
![](/3/images/news/2019/11/10725/2019-11-22-kalinouski-015-jan.jpg)
Пасля яго як прадстаўнік Беларусі са словам звярнуўся арцыбіскуп Тадэвуш Кандрусевіч. Прывітаўшы шматлікіх удзельнікаў, якія прыбылі на цырымонію перапахавання з Беларусі, у сваёй кароткай прамове іерарх, між іншым, сказаў:
«Паўстанцы былі прадстаўнікамі розных народаў і веравызнанняў. Але ўсе яны змагаліся з царызмам за свабоду сваіх народаў і за іх агульную свабоду — змагаліся „за нашу і вашу свабоду“».
«Сярод іх Кастусь Каліноўскі, сын беларускага народа, лідар нацыянальнага вызваленчага руху, публіцыст і паэт, высакародны чалавек, які вызначаўся надзвычайнаю сілаю духа і з’яўляўся адным з кіраўнікоў паўстання. Таму сённяшняя падзея мае вялікае значэнне таксама і для Беларусі», — адзначыў кіраўнік беларускага каталіцкага епіскапату.
![](/3/images/news/2019/11/10725/2019-11-22-kalinouski-008-jan.jpg)
На заканчэнне арцыбіскуп Кандрусевіч дадаў:
«Сімвалічна, што перапахаванне парэшткаў паўстанцаў адбываецца ў Вільні — горадзе Божай Міласэрнасці. Cваімі малітвамі мы спадарожнічаем загінулым паўстанцам і даручаем іх душы міласэрнаму Богу».
Пасля іерархаў прамовілі прэзідэнты Літвы і Польшчы, а таксама віцэ-прэм’ер беларускага ўраду Ігар Петрышэнка.
![](/3/images/previews/news/2019/11/10725/s-2019-11-22-kalinouski-001-jan.jpg)
![](/3/images/previews/news/2019/11/10725/s-2019-11-22-kalinouski-002-jan.jpg)
![](/3/images/previews/news/2019/11/10725/s-2019-11-22-kalinouski-003-jan.jpg)
![](/3/images/previews/news/2019/11/10725/s-2019-11-22-kalinouski-004-jan.jpg)
![](/3/images/previews/news/2019/11/10725/s-2019-11-22-kalinouski-005-jan.jpg)
![](/3/images/previews/news/2019/11/10725/s-2019-11-22-kalinouski-006-jan.jpg)
![](/3/images/previews/news/2019/11/10725/s-2019-11-22-kalinouski-007-jan.jpg)
![](/3/images/previews/news/2019/11/10725/s-2019-11-22-kalinouski-008-jan.jpg)
![](/3/images/previews/news/2019/11/10725/s-2019-11-22-kalinouski-009-jan.jpg)
![](/3/images/previews/news/2019/11/10725/s-2019-11-22-kalinouski-010-jan.jpg)
![](/3/images/previews/news/2019/11/10725/s-2019-11-22-kalinouski-011-jan.jpg)
![](/3/images/previews/news/2019/11/10725/s-2019-11-22-kalinouski-012-jan.jpg)
![](/3/images/previews/news/2019/11/10725/s-2019-11-22-kalinouski-013-jan.jpg)
![](/3/images/previews/news/2019/11/10725/s-2019-11-22-kalinouski-014-jan.jpg)
![](/3/images/previews/news/2019/11/10725/s-2019-11-22-kalinouski-015-jan.jpg)
![](/3/images/previews/news/2019/11/10725/s-2019-11-22-kalinouski-016-jan.jpg)
![](/3/images/previews/news/2019/11/10725/s-2019-11-22-kalinouski-017-jan.jpg)
![](/3/images/news/2019/11/10725/2019-11-22-kalinouski-001-jan.jpg)
![](/3/images/news/2019/11/10725/2019-11-22-kalinouski-002-jan.jpg)
![](/3/images/news/2019/11/10725/2019-11-22-kalinouski-003-jan.jpg)
![](/3/images/news/2019/11/10725/2019-11-22-kalinouski-004-jan.jpg)
![](/3/images/news/2019/11/10725/2019-11-22-kalinouski-005-jan.jpg)
![](/3/images/news/2019/11/10725/2019-11-22-kalinouski-006-jan.jpg)
![](/3/images/news/2019/11/10725/2019-11-22-kalinouski-007-jan.jpg)
![](/3/images/news/2019/11/10725/2019-11-22-kalinouski-008-jan.jpg)
![](/3/images/news/2019/11/10725/2019-11-22-kalinouski-009-jan.jpg)
![](/3/images/news/2019/11/10725/2019-11-22-kalinouski-010-jan.jpg)
![](/3/images/news/2019/11/10725/2019-11-22-kalinouski-011-jan.jpg)
![](/3/images/news/2019/11/10725/2019-11-22-kalinouski-012-jan.jpg)
![](/3/images/news/2019/11/10725/2019-11-22-kalinouski-013-jan.jpg)
![](/3/images/news/2019/11/10725/2019-11-22-kalinouski-014-jan.jpg)
![](/3/images/news/2019/11/10725/2019-11-22-kalinouski-015-jan.jpg)
![](/3/images/news/2019/11/10725/2019-11-22-kalinouski-016-jan.jpg)
![](/3/images/news/2019/11/10725/2019-11-22-kalinouski-017-jan.jpg)
Пасля святой Імшы адбыўся вынас трунаў з катэдральнай базылікі, адкуль жалобная працэсія вырушыла на могілкі Роса. Па дарозе пахавальная працэсія спынілася каля Вострай Брамы, дзе адбыўся спеў антыфоны «Тваёй абароне аддаемся, святая Багародзіца» на літоўскай, польскай і беларускай мовах.
Па-беларуску і па-польску марыйную антыфону заспяваў парафіяльны хор з касцёла св. Сымона і св. Алены ў Мінску, шырока вядомага як Чырвоны касцёл.
Пасля таго, як працэсія з парэшткамі прыбыла на могілкі Роса, труны былі ўнесены ў капліцу, дзе адбыліся абрады апошняга развітання і даручэння спачылых Божай Міласэрнасці. З кароткімі прамовамі на могілках зноў выступілі прэзідэнты Літвы і Польшчы. Парэшткі Кастуся Каліноўскага і іншых паўстанцаў атрымалі вечны спачын у пахавальных нішах у капліцы на могілках Роса.
Паўстанне 1863–1864 гг. засталося ў памяці народаў як сімвал самаахвярнага змагання за грамадзянскія правы і рэлігійную свабоду. І ў наш час гэтыя каштоўнасці маюць асноватворнае значэнне для мірнага суіснавання і сумеснага будавання лепшай будучыні, пра якую марылі высакародныя героі Кастусь Каліноўскі і яго паплечнікі.
![](https://catholic.by/3/templates/catholic/img/left.png)
![](https://catholic.by/3/templates/catholic/img/right.png)
![](https://catholic.by/3/templates/catholic/img/close.png)
![](https://catholic.by/3/templates/catholic/img/close.png)