22 лістапада ў Вільні падчас цырымоніі дзяржаўнага перапахавання нацыянальнага героя Беларусі, Літвы і Польшчы Кастуся Каліноўскага хор з Чырвонага касцёла праспяваў Марыйную антыфону ў Вострай Браме.
Пахавальная працэсія з трунамі, у якіх знаходзяцца парэшткі ўдзельнікаў вызвольнага паўстання 1863–1864 гг., па дарозе на могілкі Роса зрабіла кароткі малітоўны прыпынак каля Вострай Брамы.
Тут перад цудатворным абразом Маці Міласэрнасці прагучаў спеў Марыйнай антыфоны «Тваёй абароне аддаемся, святая Багародзіца» на літоўскай, польскай і беларускай мовах.
Па-польску і па-беларуску малітву заспяваў хор з мінскай парафіі святога Сымона і святой Алены — Чырвонага касцёла.
