14 снежня а 12-й гадзіне ў катэдральным касцёле Унебаўзяцця Найсвяцейшай Панны Марыі ў Пінску адбудзецца ўрачыстая святая Імша, падчас якой біскуп Пінскі Антоні Дзям’янка ўдзеліць сакрамэнт пасвячэння ў ступені прэзбітэрату выпускніку Пінскай вышэйшай духоўнай семінарыі імя святога Тамаша Аквінскага дыякану Янушу Чарнамораву.
Кандыдат да святарства дыякан Януш Чарнамораў нарадзіўся ў 1995 г. у мястэчку Лагішын, дзе знаходзіцца дыяцэзіяльны санктуарый Маці Божай Лагішынскай Каралевы Палесся. У 2013 годзе скончыў сярэднюю школу і паступіў у Міждыяцэзіяльную вышэйшую духоўную семінарыю імя святога Тамаша Аквінскага ў Пінску, фармацыю і навучанне ў якой скончыў у 2019 годзе, абараніўшы магістарскую працу ў Люблінскім каталіцкім універсітэце Яна Паўла II.
15 верасня 2018 года прыняў пасвячэнне дыяканату.
Пасля заканчэння семінарыйнай фармацыі біскуп Пінскі Антоні Дзям’янка скіраваў дыякана Януша Чарнаморава на душпастырскую практыку і падрыхтоўку да прыняцця пасвячэння пры пінскай катэдры, а 4 чэрвеня прызначыў яго дырэктарам Рэлігійнай місіі «Дабрачыннае каталіцкае таварыства Caritas Пінскай дыяцэзіі.
Прыміцыйную cвятую Імшу новапрэзбітэр будзе цэлебраваць у роднай парафіі святых Пятра і Паўла ў Лагішыне перад цудадзейным абразом Маці Божай Лагішынскай Каралевы Палесся 15 снежня ў 11.00.
Дыякан Януш просіць ахінуць яго малітвай на добрую падрыхтоўку да годнага прыняцця прэзбітэрскага пасвячэння і на благаслаўлёны шлях святарскага служэння.
