15 верасня, ва ўспамін Маці Божай Балеснай, у пінскім катэдральным касцёле Унебаўзяцця Найсвяцейшай Панны Марыі семінарыст Януш Чарнамораў прыняў сакрамэнт дыяканату. Урачыстую святую Імшу з гэтай нагоды ўзначаліў біскуп Пінскі Антоні Дзям’янка.
Януш Чарнамораў паходзіць з Лагішына (Пінская дыяцэзія) і вучыцца на шостым курсе Вышэйшай духоўнай семінарыі імя св. Тамаша Аквінскага ў Пінску.
На ўрачыстасць прыбылі шматлікія святары, законныя сёстры і сотні вернікаў – як з роднай парафіі дыякана, так і з іншых куткоў дыяцэзіі.
Падтрымаць дк. Януша ў гэты адказны дзень прыехалі таксама яго бацькі, сваякі і сябры.
У гаміліі біскуп Антоні адзначыў: «Дарагі брат, прымаючы дыяканат, ты прыносіш надзею пінскаму Касцёлу. Розныя групы ў нашым Касцёле чакаюць дыяканскага служэння: святары бачаць у дыякане свайго памочніка, хворыя ў шпіталях і дамах састарэлых чакаюць дыякана ў адведзіны. Сутнасць дыяканату — гэта адкрытасць на дзеянні Святога Духа».
Адметнасцю літургіі стаў спеў катэдральнага хору, якому акампаніравалі арган, скрыпка і цымбалы.
На заканчэнне св. Імшы дыякан Януш звярнуўся да прысутных са словамі падзякі. У першую чаргу ён падзякаваў за дар паклікання Богу, просячы ў Панны Марыі, каб заўсёды трымала яго за руку.
Са словамі віншавання звярнуліся таксама прадстаўнікі лагішынскай парафіі, адкуль паходзіць дыякан.
Урачыстая літургія пасвячэння трывала каля трох гадзін. Пасля заканчэння настаўнікі пінскай музычнай школы зладзілі для прысутных канцэрт духоўнай музыкі.
