![](/3/images/news/2019/11/2019-11-15-grodno-0024.jpg)
13 лістапада ў Міждыяцэзіяльнай вышэйшай духоўнай семінарыі ў Гродне адбылася пастырская сустрэча святароў, якія служаць у Гродзенскай дыяцэзіі.
Як паведаміў партал Grodnensis.by, святары сабраліся, каб паслухаць настаўленне, разам адараваць Найсвяцейшы Сакрамэнт, а таксама цэлебраваць са сваімі біскупамі Эўхарыстыю.
![](/3/images/news/2019/11/2019-11-15-grodno-0023.jpg)
З духоўным настаўленнем звярнуўся да прысутных кс. Тадэвуш Крыштопік, пробашч парафіі Беззаганнага Зачацця Найсвяцейшай Панны Марыі ў Квасоўцы.
Ён закрануў тэму небяспекі духоўнага сінкрэтызму. Святар растлумачыў, што сінкрэтызмам з’яўляецца спалучэнне розных, часта непадобных і спрэчных поглядаў.
Прыхільнікі рэлігійнага сінкрэтызму думаюць, што канкрэтная рэлігія не ахоплівае ўсяго і трэба стварыць адну «ўніверсальную рэлігію» для ўсіх людзей. Гэта павінна быць «рэлігія ўсіх рэлігій, змяшанне таго, што найлепшае для ўсіх рэлігій».
Пробашч парафіі ў Квасоўцы дадаў, што святары не змяняюць сваю рэлігію, але могуць моцна пашырыць свой монатэізм, далучаючы да сваёй веры іншыя канцэпцыі Бога і духоўнага жыцця. Ён падкрэсліў, што толькі Езус з’яўляецца Богам і Збаўцам і было б блюзнерствам і памылкай дапаўняць веру ў Яго сінкрэтызмам.
Кульмінацыяй сустрэчы стала святая Імша, цэлебрацыю якой узначаліў біскуп Гродзенскі Аляксандр Кашкевіч.
![](/3/images/news/2019/11/2019-11-15-grodno-0017.jpg)
З нагоды навэнны перад урачыстасцю Найсвяцейшай Панны Марыі Вастрабрамскай, Маці Міласэрнасці, галоўнай Апякункі Гродзенскай дыяцэзіі, якая адбываецца акурат у гэтыя дні, сабраныя маліліся асабліва за ўвесь Касцёл на Гродзеншчыне.
У гаміліі біскуп Кашкевіч заахвоціў святароў, распарадчыкаў Эўхарыстыі, адказаць сабе на пытанне пра веру ў прысутнасць Езуса сярод нас у Найсвяцейшым Сакрамэнце. Іерарх адзначыў, што святары знаходзяцца найбліжэй да Хрыста Эўхарыстычнага, прысутнага ў постацях хлеба і віна, прымаюць Яго кожны дзень у свае сэрцы, раздаюць вернаму люду.
Аднак, як зазначыў пастыр Касцёла на Гродзеншчыне, «нам самім, можа, больш, чым нашым парафіянам, пагражае руціна, і нават абыякавасць да гэтай вялікай таямніцы веры, найцудоўнейшага дару, якім з’яўляецца сапраўдная прысутнасць Езуса Хрыста ў сакрамэнце Эўхарыстыі».
Біскуп заклікаў духавенства Гродзенскай дыяцэзіі, углядаючыся ў аблічча Марыі, якая з верай адаруе нябачнага для чалавечых вачэй Сына, прасіць таксама для сябе аб дары жывой і гарачай веры ў Божую прысутнасць у сакрамэнце алтара.
«Якім жа сумным, нават трагічным было б святарства чалавека, занятага выключна сабой, які мае розныя інтарэсы, за выключэннем справаў веры, не знаходзіць часу на малітву, на штодзённую адарацыю Езуса Эўхарыстычнага, на паглыбленне ўласнага сяброўства з Богам», — дадаў іерарх.
![](/3/images/news/2019/11/2019-11-15-grodno-0038.jpg)
Сустрэча завяршылася аб’явамі Гродзенскай курыі пра актуальныя і будучыя падзеі ў дыяцэзіі.