9 верасня пры мінскай парафіі св. Францішка адбылося адкрыццё інтэграцыйнага пакоя Caritas для дзяцей. Благаслаўленне пакоя (або «святліцы»), які будзе насіць імя св. Фэлікса з Канталічэ, здзейсніў Мітрапаліт Мінска-Магілёўскі арцыбіскуп Тадэвуш Кандрусевіч.
У памяшканні будуць праводзіць развіваючыя трэнінгі, гульні, дапамагаць з выкананнем школьных хатніх заданняў. Пакой абсталявалі сучаснай мэбляй, гульнявымі матэрыяламі і камп'ютэрнай тэхнікай. З дзецьмі будуць займацца кваліфікаваныя спецыялісты, у якіх ёсць профільная адукацыя. З педагогамі таксама могуць пракансультавацца бацькі па розных пытаннях.
У цырымоніі адкрыцця ўдзельнічалі Надзвычайны і Паўнамоцны Пасол Рэспублікі Польшча ў Рэспубліцы Беларусь Артур Міхальскі, кіраўнікі і спецыялісты падобных устаноў у Мінска-Магілёўскай архідыяцэзіі і, вядома, дзеці з бацькамі.
Такія ж пакоі-«святліцы» працуюць пры Хрысціянскім сацыяльным цэнтры ў Мінску, парафіі св. Антонія ў Магілёве, парафіі Найсвяцейшай Панны Марыі Ружанцовай (св. Дамініка) у Ракаве.
Праект фінансаваны ў рамках праграмы польскага супрацоўніцтва дзеля развіцця Міністэрства замежных спраў Рэспублікі Польшча.
У сваім слове арцыбіскуп Кандрусевіч звярнуўся да фрагменту Евангелля на гэты дзень аб аздараўленні чалавека з паралізаванай рукой. Іерарх адзначыў, што Езус клапоціцца пра чалавека і яго дабро, ставіць чалавека ў цэнтры сваёй дзейнасці і таму, як апавядаецца ў гэтым фрагменце, лечыць нават у суботу, калі паводле Старога Запавету забараняецца працаваць. У іншым месцы Евангелля, дадаў арцыбіскуп, Езус кажа, што не чалавек для суботы, а субота для чалавека. Гэта азначае, што закон павінен служыць чалавеку, таму неабходна падпарадкоўвацца закону не дзеля сляпой паслухмянасці, а дзеля дабра чалавека.
«Служэнне чалавеку, які знаходзіцца ў складанай сітуацыі, павінна займаць першае месца, — заўважыў іерарх. — У гэтым крыецца навізна Новага Запавету, які даў нам Хрыстус.
Касцёл, наследуючы Хрыста, таксама стараецца служыць людзям і ў гэтай галіне супрацоўнічае з грамадскімі арганізацыямі і дзяржаўнымі структурамі.
Касцёл і дзяржава — гэта асобныя адзінкі. Іх місіі розныя. Касцёл служыць духоўнаму дабру, дзяржава — агульнаму. Аднак у цэнтры Касцёла і дзяржавы павінен быць чалавек. Гэта тое, што нас павінна аб'ядноўваць».
Рэалізацыі гэтай задачы, па словах Мітрапаліта Мінска-Магілёўскага, будзе служыць інтэграцыйны пакой Caritas, дзе будзе ажыццяўляцца выхаванне чалавека, у першую чаргу маладога, што асабліва важна ў наш час, напоўнены бясконцымі выклікамі.
Арцыбіскуп падзякаваў спонсарам праекту, найперш Пасольству Рэспублікі Польшча і дабрачыннаму каталіцкаму таварыству Caritas у Польшчы, а таксама айцам капуцынам, якія апякуюцца мінскай парафіяй св. Францішка, за рэалізацыю гэтага праекту. Ён выказаў надзею на далейшае плённае супрацоўніцтва паміж парафіяй і дзяржаўнымі структурамі ў галіне сацыяльнага служэння чалавеку.
