З 1 па 4 жніўня ў Івянцы праходзіла Дзявятая парафіяда дзяцей і моладзі Мінска-Магілёўскай архідыяцэзіі, якая ўжо стала гісторыяй.
Сёлета гэтае рэлігійна-культурна-спартовае мерапрыемства сабрала 125 удзельнікаў ва ўзросце ад васьмі да сямнаццаці гадоў з дзесяці парафій Мінска-Магілёўскай архідыяцэзіі. Для ўсіх іх парафіяда стала цудоўным часам новых сустрэч, знаёмстваў, асабістых і супольных дасягненняў, новага духоўнага і жыццёвага вопыту.
Яшчэ не раз у размовах і ў памяці юнакі і дзяўчаты будуць вяртацца ў гэтыя перажытыя ў Івянцы чатыры незабыўныя дні.
Вядома, штосьці з часам забудзецца, але дзякуючы фотаздымкам, якіх падчас парафіяды было зроблена нямала, можна будзе нанава перажыць гэтыя цудоўныя моманты.
Для Анастасіі Раманавай, якая вяла фотахроніку Дзявятай парафіяды дзяцей і моладзі Мінска-Магілёўскай архідыяцэзіі, гэта быў першы вопыт падобнай рэпарцёрскай дзейнасці. Дзякуючы яе ахвярнай працы ў гэтыя чатыры дні за падзеямі на парафіядзе маглі сачыць чытачы парталу Catholic.by, у тым ліку і самі ўдзельнікі, а таксама іх бацькі, родныя і сябры.
Калі агонь парафіяды згас да наступнага года, мы прапануем падборку здымкаў афіцыйнага фатографа Дзявятай парафіяды дзяцей і моладзі Мінска-Магілёўскай архідыяцэзіі Анастасіі Раманавай, якая захавала для гісторыі і для душы так шмат цудоўных момантаў, у чым вы можаце пераканацца на ўласныя вочы.
