30 мая, ва ўрачыстасць Унебаўшэсця Пана, у мiнскім катэдральным касцёле Найсвяцейшага Імя Марыі арцыбіскуп Тадэвуш Кандрусевіч благаславіць мемарыяльную шыльду ў гонар Станiслава Манюшкi.
Сёлета адзначаецца 200-годдзе з дня нараджэння гэтага славутага кампазітара, арганіста і дырыжора, які ў дзяцінстве і маладосці жыў у Мінску. Менавіта тут ён атрымаў пачаткі музычнай адукацыі.
З нагоды юбілею аўтара шматлікіх рэлігійных твораў, сярод якіх і славуты цыкл кампазіцый пад назваю «Песні нашага касцёла», Мітрапаліт Мінска-Магілёўскі арцыбіскуп Тадэвуш Кандрусевіч благаславіць мемарыяльную шыльду ў гонар Станіслава Манюшкі, усталяваную ў мінскім катэдральным касцёле, размешчаным на плошчы Свабоды, 9.
Благаслаўленне адбудзецца падчас св. Імшы, якая распачнецца ў 18.30.
Мемарыяльную шыльду выканаў вядомы скульптар Валяр’ян Янушкевіч, аўтар шматлікіх твораў сакральнага мастацтва, якія знаходзяцца ў касцёлах па ўсёй Беларусі, а таксама мемарыяльных знакаў у гонар нашых славутых землякоў, якія можна ўбачыць таксама за мяжой.
