2 сакавіка ў парафіі св. Казіміра ў Стоўбцах з удзелам арцыбіскупа Кандрусевіча адбудзецца адпустовая ўрачыстасць і біблійны сімпозіум, у межах якога будзе прэзентаваны Новы Запавет у перакладзе на беларускую мову.
У XVII ст. у Стоўбцах пры дамініканскім кляштары быў пабудаваны касцёл св. Казіміра. Штогадовы фэст у гонар святога апекуна называўся тут «Стаўпецкія Казюкі» — па аналогіі з Віленскімі. У другой палове ХІХ ст. царскімі сатрапамі святыня была канфіскавана і перароблена ў праваслаўную царкву, а ў 1958 г. наогул знішчана бязбожнай савецкай уладай.
2 сакавіка ўпершыню пасля Другой сусветнай вайны адбудзецца малітва на месцы разбуранага касцёла св. Казіміра і працэсія з абразом святога апекуна да касцёла, які будуецца.
Фундамент разбуранага касцёла знаходзіцца на стадыёне 2-й сярэдняй школы г. Стоўбцы, дзе 11 лютага гэтага года адбылася трагедыя.
Таксама на гэтым месцы спачываюць рэліквіі Слугі Божага а. Фабіяна Мілашэвіча, першага прыёра стаўбцоўскага кляштара і будаўніка знішчанай святыні.
Праграма:
- 09.00 — сустрэча арцыбіскупа Тадэвуша Кандрусевіча, Мітрапаліта Мінска-Магілёўскага, з калектывам настаўнікаў сярэдняй школы № 2 у Стоўбцах
- 09.30 — малітва пра заступніцтва святога Казіміра на месцы зруйнаванага касцёла і працэсія з абразом святога да парафіяльнага касцёла
- 10.00 — святая Імша з удзелам арцыбіскупа Тадэвуша Кандрусевіча
- 12.00 — сімпозіум, прысвечаны першаму поўнаму афіцыйнаму выданню Новага Запавету на беларускай мове ў раённым Цэнтры культуры.
