![](/3/images/news/2019/01/2019-01-16-Boys-Town-Tracy-Group.jpg)
Хрысціянскі кінаклуб «Рэха» запрашае на прагляд фільма «Горад хлопчыкаў» (англ. Boys Town), які адбудзецца 20 студзеня.
![i.pinimg.com](/3/images/news/2019/01/2019-01-16-b877dad0fffd92ca7edf14c5863744be.jpg)
Стужка была знятая амерыканскім режысёрам Норманам Таўрагам у 1938 г. Фільм з’яўляецца біяграфіяй амерыканскага каталіцкага святара Эдварда Флэнагана, дэвіз якога па жыцці быў: «Дрэнных хлопчыкаў не бывае».
Сапраўднасць гэтага дэвізу ён пацвярджаў канкрэтнымі справамі, заснаваўшы Boys Town — Горад хлопчыкаў для беспрытульных, асацыяльных хлопчыкаў, якія часта былі ў разладзе з законам. Усё сваё жыццё святар прысвяціў працы з гэтымі дзецьмі, дапамагаючы ім стаць добрымі людзьмі.
Актор Спэнсар Трэйсі, які выканаў ролю айца Флэнагана, атрымаў за яе прэмію амерыканскай кінаакадэміі «Оскар». Таксама і яго прататып, сам айцец Флэнаган, атрымаў шырокае прызнанне сваёй педагагічнай дзейнасці.
Яго праца была адзначана шматлікімі ўзнагародамі, а папа Пій ХІ надаў яму тытул Ганаровага прэлата Яго Святасці. У 2012 г. распачаўся працэс кананізацыі святара.
![](/3/images/news/2019/01/2019-01-16-publicity.jpg)
Даведацца больш пра жыццё і працу гэтага незвычайнага чалавека, паглядзець стары добры, трошкі сентыментальны і з добрым гумарам фільм можна 20 студзеня ў касцёле Узвышэння Святога Крыжа па адрасе:
г. Мінск, Кальварыйскі праезд, 1.
Пачатак а 19-й гадзіне. Уваход вольны.