14 верасня, у свята Узвышэння Святога Крыжа, арцыбіскуп эмэрыт Тадэвуш Кандрусевіч узначаліў цэлебрацыю святой Імшы ў Кальварыйскім касцёле ў Мінску, падчас якой удзяліў сакрамэнт канфірмацыі групе вернікаў.
У парафіяльнае свята тытулу касцёла заслужаны іерарх прамовіў гамілію, у якой перадусім падкрэсліў, што крыж, які быў вядомы ў старажытнасці як прылада жудаснай смерці, дзякуючы крыжовай смерці Езуса на ерузалемскай Кальварыі стаў знакам збаўлення.
«Для няверуючага чалавека крыж не мае ніякага сэнсу, бо гэта сімвал цярпенняў і жудаснай смерці. Але для хрысціяніна — гэта знак збаўлення і надзеі», — адзначыў арцыбіскуп Кандрусевіч.
Іерарх дадаў, што ў наш час вядзецца адкрытая барацьба з крыжам і што нават некаторыя хрысціяне таксама яго саромеюцца.
«Касцёл звяртае нашу ўвагу на крыж не толькі для таго, каб мы перад ім маліліся, разважалі і цалавалі яго, але таксама каб прыняць яго як лад нашага жыцця. <…> Прыняць крыжовы шлях азначае адмовіцца ад грахоўнага жыцця і абавязацца жыць жыццём Божай ласкі», — падкрэсліў арцыбіскуп Кандрусевіч.
Ён зазначыў, што тыя, хто ў гэты дзень прымалі сакрамэнт канфірмацыі, будуць умацаваныя дарамі Святога Духа, каб мужна вызнаваць сваю веру і яе бараніць.
«Хрысціянскае жыццё — гэта школа крыжа. Крыж Езуса, які мы носім у сабе, знаходзіцца ў цэнтры таямніцы Божай любові і нашай веры. <…> Крыж — гэта наша надзея, бо без ахвярнага трыумфу Хрыста на крыжы ў нас не было б надзеі на вечнае збаўленне. Крыж — гэта лесвіца, якую Езус зрабіў, каб па ёй мы маглі ўзысці ў радасць неба. Крыж — найвялікшая ў свеце гісторыя любові Бога да чалавека, і мы знаходзімся ў яе цэнтры», — сказаў на заканчэнне гаміліі арцыбіскуп Тадэвуш Кандрусевіч, заахвоціўшы кандыдатаў да канфірмацыі і ўсіх прысутных у касцёле сваім жыццём сведчыць пра трыумф крыжа.
