18 лістапада хрысцiянскi кiнаклуб «Рэха» запрашае ў мінскі касцёл Узвышэння Святога Крыжа (Кальварыйскі праезд, 1) на чарговае пасяджэнне і прагляд фільма.
Удзельнікі працягнуць разважаць над цнотамі. Гэтым разам яны будуць гаварыць аб веры.
Фільм «Сховішча», які прапануецца паглядзець, заснаваны на сапраўдных падзеях, якія адбываліся падчас Другой сусветнай вайны ў Нідэрландах. Фільм зняты паводле аўтабіяграфіі Коры тэн Бом – хрысціянкі, катэхеткі, падпольшчыцы, якая ўратавала шмат габрэяў ад смерці, праведніка свету.
Менавіта вера давала ёй моц падчас усіх выпрабаванняў. Яна распавядала, што выстаяць ёй больш за ўсё дапамаглі словы з Апакаліпсісу: «Я паставіў цябе перад адчыненымі дзвярыма, якіх ніхто не можа зачыніць» (Ап 3, 8).
Фільм зняты ў ЗША ў 1975 г. рэжысёрам Джэймсам Колье.
Усіх жадаючых запрашаюць разам паразважаць аб веры, задумацца аб тым, як выглядае наша вера, асабліва ў час выпрабаванняў.
Пачатак у 19.00. Уваход вольны.
