Элана Лыскова больш ведаюць як мастака-фатографа, таму гэта выстаўка для яго — своеасаблівы творчы эксперымент і пошук сябе як творчай асобы.
На экспазіцыі будуць прадстаўлены творы жывапісу і графікі, якія мастак ствараў на працягу некалькіх апошніх гадоў.
Першая персанальная выстаўка Элана Лыскова пад назвай «Крыж Божай любові» адкрыецца 1 чэрвеня ў мастацкай галерэі «Універсітэт культуры» (Палац Рэспублікі, Кастрычніцкая плошча, 1). Пачатак у 18.00.
Асноўная тэма яго карцін — гэта Бог і Яго бязмежная любоў. Ведаючы біблейскія сюжэты, аўтар у своеасаблівым стылі ўвасабляе іх на палотнах пры дапамозе фарбаў ці фламастараў.
Яго работы — гэта не толькі гульня кантрастаў і незвычайнага каларыту, але і асаблівы погляд на герояў сваіх палотнаў.
Напрыклад, Хрыста на адной са сваіх карцін мастак намаляваў як звычайнага, стомленага пасля цяжкай працы чалавека ў цяслярнай майстэрні. Амаль усе карціны Лыскова прасякнуты сімваламі веры і асабістымі роздумамі.
Акрамя выяў святых Элан піша партрэты людзей, якія ўвайшлі ў гісторыю як пакутнікі веры і Апосталы свайго часу. Тэме святарства і паклікання прысвечана не адна кампазіцыя аўтара.
Элан Лыскоў — практыкуючы вернік, і менавіта ў святыні да яго прыходзілі новыя ідэі.
Пра сваю выстаўку Элан Лыскоў кажа так:
«Калі спаткаў Езуса, то ўсё змянілася ў маёй творчасці. Я атрымаў магчымасць адрозніваць колеры, адрозніваць чорны ад белага. Калі думкі сталі больш простымі, мне стала лягчэй іх пераказваць. Такія простыя думкі, як: „Бог ёсць Любоў“ альбо яшчэ прасцей: „Бог ёсць“ дапамаглі мне адрозніваць і выбіраць больш адважна. Каб намаляваць нейкі вобраз, патрэбны адвага і сілы, іх я атрымаў у малітве. Крыж Божай Любові — гэта проста. Любоў Езуса не дазваляе мне больш несці мой крыж аднаму, таму я шчаслівы мастак, вельмі шчаслівы».
Куратар выстаўкі — мастак Надзея Бука. Выстаўка працягнецца да 17 чэрвеня 2018 года.
