«Я не забуду пра цябе» (Іс 49,15) — так гучыць тэма, якую 10 лютага Папа Леў XIV выбраў для VI Сусветнага дня бабуль, дзядуль і пажылых людзей, каб нагадаць, што нават калі кожны чалавек старэе, любоў Бога да яго не слабее ніколі, паведамляе Беларуская рэдакцыя Vatican News.
— паведаміла Дыкастэрыя па справах свецкіх, сям’і і жыцця.
У сваім пасланні на гэты дзень, якое было абнародавана 15 чэрвеня, Папа падкрэсліў, што Касцёл пакліканы быць маці для кожнага чалавека ў любым узросце. Ён заклікаў моладзь аднавіць прыгожую звычку наведваць сваіх дзядуль, бабуль і самотных пажылых людзей. Праз сваю прысутнасць маладыя людзі могуць перадаць старэйшым блізкасць і цеплыню.
Сусветны дзень бабуль, дзядуль і пажылых людзей, устаноўлены Папам Францішкам у 2021 годзе, адзначаецца кожную чацвёртую нядзелю ліпеня і з’яўляецца нагодай, каб выказаць пажылым блізкасць Касцёла і адкрыць каштоўнасць іх укладу ў жыццё сем’яў і грамадства.
Сёлета яго дата — 26 ліпеня — супадае з успамінам святых Яўхіма і Ганны, таму Пантыфік заклікае правесці ў гэты Дзень эўхарыстычную цэлебрацыю ў катэдральным касцёле кожнай дыяцэзіі.
У адказ на заклік Святога Айца, паводле інфармацыі інтэрнэт-старонкі catholicminsk.by, ў Мінска-Магілёўскай архідыяцэзіі 26 ліпеня адбудзецца адмысловая святая Імша з удзелам пажылых людзей і асобаў сталага ўзросту, якую ўзначаліць арцыбіскуп эмэрыт Мінска-Магілёўскі Тадэвуш Кандрусевіч. Нагадаем, што сёлета іерарху споўнілася 80 гадоў.
Пачатак у 13.00.
Пасля Эўхарыстыі святкаванне працягнецца ва ўнутраным двары мінскай катэдры.
Інфармацыя пра святкаванне Сусветнага дня пажылых людзей у іншых дыяцэзіях Беларусі будзе пададзена пазней.
