У аўторак 2 ліпеня, ва ўрачыстасць Апякункі Мінска-Магілёўскай архідыяцэзіі Маці Божай Будслаўскай, у мінскім касцёле, пасвячаным у Яе гонар, адзначаць парафіяльны адпуст.
Сталічны касцёл Маці Божай Будслаўскай — адзіная ў нашай краіне святыня пад такім тытулам.
Урачыстыя цэлебрацыі ў дзень адпусту тут адбудуцца а 10-й гадзіне (з працэсіяй з копіяй цудадзейнага абраза) і а 18-й гадзіне ўвечары.
Пробашч парафіі Маці Божай Будслаўскай у Мінску ксёндз канонік Францішак Рудзь ад імя парафіянаў запрашае да ўдзелу ўсіх ахвотных, асабліва тых, хто не мае магчымасці быць на фэсце ў Будславе, які на нацыянальным узроўні сёлета будзе адзначацца 5 і 6 ліпеня.
- Адрас: касцёл Маці Божай Будслаўскай, вул. Прытыцкага 107-А (станцыя метро «Каменная Горка»).
2 ліпеня ў парафіі Унебаўзяцця Найсвяцейшай Панны Марыі ў Будславе таксама адзначаць парафіяльны адпуст. Цэлебрацыя святых Імшаў з будслаўскай базылікі ў гэты дзень будзе даступная на партале Catholic.by.
