20 лютага дапаможны біскуп Варшаўскай архідыяцэзіі Міхал Яноха возьме ўдзел у сустрэчы з прадстаўнікамі беларускай каталіцкай супольнасці польскай сталіцы, пасля чаго памоліцца разам з імі на святой Імшы на беларускай мове.
Сустрэча з іерархам, які ў польскім каталіцкім епіскапаце ўзначальвае Раду па справах культуры і аховы культурнай спадчыны, адбудзецца ў варшаўскай парафіі святога Аляксандра, пры якой дзейнічае душпастырства беларусаў.
Біскуп Яноха — вядомы спецыяліст у галіне гісторыі мастацтва, чые навуковыя даследаванні скіраваныя на вывучэнне іканапісу і візантыйскай традыцыі ў параўнальнай перспектыве Усходу і Захаду.
Іерарх. добра знаёмы таксама з беларускай культурай, 20 студзеня ўзначаліў у варшаўскай архікатэдры цэлебрацыю святой Імшы з нагоды 500-гадовага юбілею з часу выдання «Малой падарожнай кніжыцы» Францішка Скарыны, якая стала першым друкаваным малітоўнікам на беларускай мове.
- Пачатак сустрэчы — у 17.00 (дольны касцёл). Падчас размовы з біскупам Міхалам Янохам будзе магчымасць задаць яму пытанні.
- А 18-й гадзіне — супольная святая Імша з біскупам па-беларуску (дольны касцёл).
Сустрэчы беларускай каталіцкай супольнасці ў Варшаве рэгулярна адбываюцца ў дольным касцёле парафіі святога Аляксандра на пляцы Трох Крыжоў. Адказны за душпастрыства беларускіх католікаў у сталіцы Польшчы — ксёндз Яўген Вінтоў.
