22 ліпеня а 17-й гадзіне ў Палацы мастацтва адбудзецца цырымонія адкрыцця Рэспубліканскай выставы «Трыенале сучаснага мастацтва» па выніках Рэспубліканскага конкурсу «Нацыянальная прэмія ў галіне выяўленчага мастацтва» ў 2019–2020 гадах.
Сярод 12 фатографаў у намінацыі «мастацкая фатаграфія» ў розных мастацкіх тэхніках трыма аўтарамі будуць прадстаўлены серыі фотапрац прысвечаны хрыстыянскай тэматыцы.
Серыя фотапрац фатографа Віктара Ведзеня «Рараты» з праекту «Каталіцтва. Уступ» распавядае пра адну з адвэнтавых каталіцкіх традыцый у Беларусі.
Раней экспазіцыя была паказана ў снежні мінулага года ў Народным фотаклубе «Мінск».
Фотамастак Валерый Вядрэнка прадставіць серыю прац «Містэрыі Гервятаў», прысвечаную адной з найпрыгажэйшых святыняў Беларусі — касцёлу Найсвяцейшай Тройцы ў Гервятах.
Выдавец і фотамастак Дзяніс Раманюк прадставіць серыю фатаграфій «Беларусь. Храм і краявід», прысвечаную храмавай архітэктуры краіны.
Таксама будзе прадстаўлена серыя фотапрац фатографа Віктара Сянькова «Памяць застаецца», якая распавядае пра дзясяткі знаёмых і закінутых могілак краіны, — дзесяць гадоў працы над тэмай і каля тысячы негатываў матэрыялу.
Значная частка «мастацкай фатаграфіі» будзе размешчана ў прасторы ZAL #2, а таксама ў асноўных залах.
Акрамя намінацыі «мастацкая фатаграфія», экспазіцыя прадставіць 92 працы, якія былі вызначаны адборачнай камісіяй з некалькіх соцень заявак па намінацыях: «Жывапіс», «Графіка», «Скульптура», «Дызайн», «Актуальнае мастацтва» (арт-аб’ект, інсталяцыя), «Манументальнае і манументальна-дэкаратыўнае мастацтва», «Дэкаратыўна-прыкладное мастацтва», «Мастацтвазнаўства і крытыка», «Творчы дэбют».
У перыяд правядзення выставы прафесійнае журы вызначыць лаўрэатаў конкурсу з ліку прэтэндэнтаў.
Пераможцы атрымаюць грашовую прэмію, дыплом лаўрэата і спецыяльны прыз. Таксама будуць уручаны дыпломы «За ўклад у развіццё выяўленчага мастацтва» і «Мецэнат выяўленчага мастацтва». Па выніках выставы будзе падрыхтаваны каталог.
Выстава працягнецца да 7 жніўня. Яе можна наведаць з 11 да 19 гадзін. Час працы: аўторак-нядзеля. Адрас: Мінск, вул. Казлова, 3, Палац мастацтва.
Урачыстае закрыццё выставы і цырымонія ўзнагароджання адбудуцца 7 жніўня ў 17.00.
