У нядзелю 18 жніўня ў нарачанскай парафіі святога Андрэя, апостала, з удзелам арцыбіскупа Тадэвуша Кандрусевіча адзначаць традыцыйны тут адпуст у гонар святога Роха.
Візіт арцыпастыра ў каталіцкую супольнасць Нарачы прымеркаваны да дзвюх памятных дат у гісторыі мясцовай парафіі.
Сёлета спаўняецца 585 гадоў з таго часу, калі ў Кабыльніку (сёння — вёска Нарач) быў пабудаваны першы драўляны касцёл, а 115 гадоў таму тут адбылося асвячэнне цяперашняй мураванай святыні.
З гэтай нагоды Мітрапаліт Мінска-Магілёўскі арцыбіскуп Тадэвуш Кандрусевіч узначаліць цэлебрацыю ўрачыстай святой Імшы, падчас якой удзеліць групе нарачанскай моладзі сакрамэнт канфірмацыі.
Пачатак а 12-й гадзіне.
Урачыстасці будзе папярэднічаць Саракагадзіннае набажэнства, якое штогод праводзіцца ў парафіі ў гонар асабліва шанаванага тутэйшымі вернікамі святога Роха — заступніка ад хваробаў людзей і жывёлы. З нагоды памятных дат у Нарачы таксама праходзіць конкурс відэаролікаў «Гісторыя нарачанскай парафіі вачыма вернікаў».
