16 жніўня арцыбіскуп эмэрыт Тадэвуш Кандрусевіч узначаліў адпустовае набажэнства ў гонар святога Роха ў парафіі святога Яна Хрысціцеля ў Волме (Мінска-Магілёўская архідыяцэзія, Валожынскі дэканат).
Традыцыйна ў гэты дзень вернікі з вёскі Кавальцы нясуць у працэсіі старадаўні абраз святога Роха. Людзі праходзяць пад ім, просячы ў святога заступніка апекі і абароны ад хваробаў цела і душы.
Напачатку заслужаны іерарх нагадаў удзельнікам жыццярыс святога Роха, адзначыўшы, што яго ўшаноўваюць як апекуна і ратаўніка ад заразных хвароб і эпідэмій. Культ святога з даўніх часоў распаўсюджаны таксама ў Беларусі.
Заўважыўшы, што святы Рох меў дар аздараўлення ад чумы і сам перанёс гэтую смяротна небяспечную хваробу, арцыбіскуп Кандрусевіч адзначыў, што акрамя фізічнай чумы існуе таксама і духоўная.
«Мы не бачым інфекцыі чумы, але яна існуе і вельмі небяспечная. Таксама не бачым грахоўнай інфекцыі, якая забівае душу і нішчыць духоўнае жыццё чалавека.
Фармацэўты знайшлі вакцыну ад каранавірусу, за што ім дзякуем. Вакцынай жа ад грахоўнага вірусу з’яўляецца Божая ласка, лекарам — Езус Хрыстус, а лякарняй — Касцёл», — сцвердзіў заслужаны іерарх.
Сваю гамілію арцыбіскуп Тадэвуш Кандрусевіч завяршыў кароткай імправізаванай малітвай: «Божа, Ты паабяцаў святому Роху ахоўваць ад хвароб кожнага, хто звернецца да яго. Дамапажы нам, каб дзякуючы яго апецы мы былі вызвалены ад хваробы цела і душы».
