З 9 па 18 жніўня ў Друі, што на Браслаўшчыне, у даўнім кляштары бэрнардынаў пры касцёле Святой Тройцы пройдзе Пяты міжнародны мастацкі пленэр, у якім возьмуць удзел прафесійныя мастакі.
Асноўная мэта пленэру, які ўжо ў пяты раз ладзіцца ў старажытных мурах друйскага кляштара — дыялог рэлігіі і мастацтва, будаўніцтва мастоў, пошук супольнай гамы, дэталізацыя адценняў сумоўя.
У Друі мастакі будуць не толькі маляваць. Жывучы ў кляштары, яны маюць магчымасць паглыбіць сваю асабістую духоўнасць дзякуючы арганізаваным для іх канферэнцыям і набажэнствам.
Мастацкая палітра ўдзельнікаў прадстаўлена ў вельмі шырокім дыяпазоне: Кацярына Говен, Аляксандр Грышкевіч, Аляксандр Даманаў, Марына Зуева, Алег Іларыёнаў, Таццяна Кандраценка, Інга Карашкевіч, Таццяна Карпачова, Кастусь Качан, Кацярына Пашкевіч, Улад Пятручык, Кацярына Сумарава, Дар’я Сумарава-Копач, Павал Хадаровіч, Алена Чэпелева, Яўген Шадко, Наталля Шкраба і іншыя. Стыль, спосаб пісьма і тэхніка жывапісу ўдзельнікаў пленэру ахоплівае самыя розныя кірункі сучаснага мастацтва.
18 жніўня адбудзецца выстава мастацкіх прац па выніках пленэру.
На вернісаж, які адкрыецца а 10-й гадзіне ў будынку старадаўняга бэрнардынскага кляштара і будзе працягвацца адзін дзень, арганізатары запрашаюць усіх жадаючых.
Паколькі мястэчка Друя знаходзіцца ў памежнай зоне, усім гасцям неабходна мець пры сабе пашпарт.
