27 ліпеня ў вёсцы Тракелі, што на Астравеччыне (парафія Дайлідкі, Гродзенская дыяцэзія), адбудзецца ўрачыстая святая Імша каля крыніцы Якуба — старадаўняга месца культу мясцовых вернікаў.
Вада — біблійны сімвал жыцця, евангельскі сімвал Святога Духа, які ўсё ажыўляе і аднаўляе. Нездарма ў славянаў з найдаўнейшых часоў крыніца — месца святое. Таму савецкія змагары з рэлігіяй імкнуліся знішчаць такія месцы, каб без жыватворчай вады засохла дрэва святой веры, што каранямі сягае далёка ў глыбіні роднай зямелькі-маці.
Таксама і ў невялічкай вёсцы Тракелі, дзе стагоддзямі вернікі чэрпалі гаючую ваду з крыніцы святога Якуба, гэтае месца культу было знішчана: крыж спілавалі, крыніцу засыпалі. Але вера простага люду перажыла нялюдскую савецкую ідэалогію. Мясцовыя вернікі разам са сваім шматгадовым пробашчам ксяндзом Алегам Шпенем адрадзілі святую крыніцу. Цяпер тут штогод, як і ў даўнія часы, праходзіць святая Імша ў свята святога апостала Якуба.
Сёлетняя ўрачыстасць каля крыніцы святога Якуба ў Тракелях адбудзецца ў суботу, 27 ліпеня, а 12-й гадзіне.
Пробашч парафіі Апекі Найсвяцейшай Панны Марыі ў Дайлідках кс. Алег Шпень і мясцовыя вернікі шчыра запрашаюць усіх жадаючых узяць удзел ва ўрачыстасці. Тым, хто будзе ехаць у Тракелі з боку Астраўца, варта звярнуць увагу на тое, што ў сувязі з рамонтам дарогі ад кальца трэба паварочваць на аб’езд праз вёску Трайгі ў бок Ашмянаў.
![](https://catholic.by/3/templates/catholic/img/left.png)
![](https://catholic.by/3/templates/catholic/img/right.png)
![](https://catholic.by/3/templates/catholic/img/close.png)
![](https://catholic.by/3/templates/catholic/img/close.png)