Пошук


09.07.2019 13:57   Бп. Юзаф Станеўскі / Catholic.by
Фота: teleradiopadrepio.it

Адказны за душпастырства моладзі біскуп Юзаф Станеўскі прапануе беларускім юнакам і дзяўчатам падчас летніх канікул разам прачытаць паслясінадальную Апостальскую адгартацыю папы Францішка Christus Vivit — «Хрыстус жыве», — напісаную ў форме ліста да моладзі.

Любая моладзь, дарагія браты і сёстры,

25 сакавіка, ва ўрачыстасць Звеставання Пана, у санктуарыі Святога Дома Марыі ў італьянскім горадзе Ларэта папа Францішак падпісаў  паслясінадальную Апостальскую адгартацыю Christus vivit — «Хрыстус жыве». Яна стала вынікам працы многіх людзей Касцёла, якія клапоцяцца пра моладзь ва ўсім свеце. Адгартацыя — гэта ліст Святога Айца да моладзі. Аднак ён напісаны і адрасаваны не толькі моладзі, а ўсёй супольнасці Хрыстовага Касцёла.

Таму заахвочваю ўсіх да чытання адгартацыі Christus vivit і разважання над яе зместам.

Папа Францішак у Ларэта падпісвае адгартацыю «Жыве Хрыстус». Фота telepacenews.it

Традыцыйна афіцыйныя дакументы Касцёла выдаюцца на лацінскай мове. Дзякуючы Секцыі па перакладзе літургічных тэкстаў і афіцыйных дакументаў Касцёла Камісіі Божага Культу і Дысцыпліны Сакрамэнтаў пры Канферэнцыі Каталіцкіх Біскупаў Беларусі на чале з ксяндзом доктарам Янам Крэмісам тэкст дакумента быў перакладзены на беларускую мову. Перакладзеную адгартацыю падрыхтавалі да друку браты з Ордэна Меншых Братоў Капуцынаў у Беларусі на чале з кусташам братам Алегам Шэндам OFMCap.

Усім тым, хто прычыніўся да перакладу і выдання Апостальскай адгартацыі папы Францішка Christus Vivit, я ад імя моладзі шчыра дзякую за працу.

Цяпер мы цяпер можам пазнаёміцца з думкай Папы, чытаць гэты дакумент і трымаць яго ў руках у форме кнігі. Кніга — гэта таксама добры падарунак. Маючы свой экзэмпляр, я магу падкрэсліць і занатаваць на палях тое, што мне лягло на сэрца. Дзякуй яшчэ раз усім вам!

Аднак…

Сёння не кожны прызвычаены да чытання і, можа, лепш успрымае інфармацыю на слых. Таму я прапаную вам чытаць ліст Папы да моладзі разам. Гэта даступна і проста!

Малады чалавек (а значыць таксама адрасат папскага паслання), студэнт 6-га курса Міждыяцэзіяльнай вышэйшай духоўнай семінарыі ў Гродне Яўген Амасёнак здзейсніў аўдыёзапіс адгартацыі.

Ён сам чытае адгартацыю «ад сэрца», дзеліцца яе зместам і запрашае да «чытання разам».

Фота: «Слова Жыцця»

Я дзякую Яўгену за гэтую моладзевую ініцыятыву: цяпер мы можам і слухаць, і чытаць, і рэалізаваць парады папы Францішка разам.

«Хрыстус жыве, Ён — наша надзея і самая прыгожая маладосць гэтага свету. Усё, да чаго Ён дакранаецца, становіцца маладым, зноў напаўняецца жыццём».

Дарагі сябра, дазволь, каб гэта здзейснілася і ў тваім жыцці, таму чытайма разам!

Працяг ТУТ>>>

Абноўлена 16.07.2019 09:03
Пры выкарыстанні матэрыялаў Catholic.by спасылка абавязковая. Калі ласка, азнаёмцеся з умовамі выкарыстання

Дарагія чытачы! Catholic.by — некамерцыйны праект, існуе за кошт ахвяраванняў і дабрачыннай дапамогі. Мы просім падтрымаць нашу дзейнасць. Ці будзе наш партал існаваць далей, у значнай ступені залежыць ад вас. Шчыра дзякуем за ахвярнасць, молімся за ўсіх, хто нас падтрымлівае.

. . . . . . . . . . . . . . . . . . . . . . . . . . . . . . . . . . . . . . . . . . . . . . . . . . . . . . . . . . . . .
Папа Францішак

Спагадлівасць - гэта праява Божай
Міласэрнасці, адзін з сямі дароў Святога Духа