Як паведамляюць інфармацыйныя агенцтвы, лічба ахвяраў крывававых тэрактаў у Шры-Ланцы, якія адбыліся ў гэтай астраўной краіне ў Велікодную нядзелю 21 красавіка, узрасла да 310 асобаў.
Нягледзячы на намаганні мясцовых медыкаў, людзі працягваюць паміраць ад цяжкіх раненняў, атрыманых ад выбухаў у касцёлах і гатэлі. Як паведамлялася раней, у выніку тэрактаў загінула 290 асобаў і каля 500 атрымалі раненні, многія з іх — цяжкія.
Беларуская рэдакцыя партала Vatican News інфармуе, што пасля малітвы Regina Cœli, якая 22 красавіка прайшла ў Ватыкане, папа Францішак запэўніў у сваёй духоўнай і айцоўскай салідарнасці з жыхарамі Шры-Ланкі ў сувязі з крывавымі тэрактамі.
Прадстаўнікі паліцыі Шры-Ланкі паведамляюць, што ў выніку аператыўных дзеянняў было затрымана каля 40 чалавек, якіх падазраюць у падрыхтоўцы і арганізацыі выбухаў.
Аўторак у краіне абвешчаны днём нацыянальнай жалобы. У гэты дзень таксама ў касцёлах на Беларусі будуць маліцца аб вечным жыцці для ўсіх загінулых і аб хутчэйшым выздараўленні для параненых у тэрактах.
