23 красавіка ў рэктаральным касцёле Звеставання Найсвяцейшай Панне Марыі ў Гродне маліліся за ахвяраў тэрарыстычных актаў, якія адбыліся на Вялікдзень у Шры-Ланцы.
Як паведамляе партал Grodnensis.by, на малітве сабраліся разам прадстаўнікі розных рэлігій: хрысціяне, будысты, індуісты, мусульмане. Сярод удзельнiкаў былі студэнты са Шры-Ланкі, якія вучацца ў навучальных установах горада на Нёмане. Малітву ўзначаліў рэктар пабрыгіцкага касцёла кс. канонік Антоні Грэмза.
Супольная малітва стала выразам салідарнасці з жыхарамі Шры-Ланкі, якія ў апошнія дні перажываюць вялікі боль пасля крывавых тэрактаў, што адбыліся ў розных гарадах гэтай астраўной краіны ў самае галоўнае хрысціянскае свята.
У аўторак у Шры-Ланцы быў абвешчаны дзень нацыянальнай жалобы.
Нагадаем, што ў выніку выбухаў, якія мелі месца 21 красавіка ў некалькіх касцёлах і ў гатэлі, загінулі 310 асобаў і каля 500 атрымалі раненні.
