23 студзеня, а па мінскім часе — пасля апоўначы 24 студзеня, Святы Айцец прыбыў у Панаму, дзе возьме ўдзел у 34-х Сусветных днях моладзі.
Як паведамляе італьянская рэдакцыя паратала Vatican News, у аэрапорце папу Францішка сустракалі каля дзвюх тысяч юнакоў и дзяўчат, прэзідэнт краіны Хуан Карлас Варэла Радрыгес з жонкай, а таксама прадстаўнікі панамскага епіскапату.
Перш, чым сесці ў машыну і скіравацца ў Апостальскую нунцыятуру, Святы Айцец спантанна падышоў да агароджы, каб прывітацца з сустракаючымі, паціскаючы рукі і цалуючы дзяцей, якіх сам панамскі прэзідэнт да яго падносіў.
Уздоўж усёй дарогі ў нунцыятуру працягласцю ў 28 км папу Францішка гучна і з вялікім энтузіязмам вітала моладзь з усяго свету. Усяго Сусветныя дні моладзі сабралі ў Панаме каля 150 тыс. удзельнікаў з розных кантынентаў і краін, у тым ліку і з Беларусі.
Візіт папы Францішка ў Панаму — другое наведанне Пантыфікам гэтай цэнтральнаамерыканскай краіны. Упершыню Панаму наведаў св. Ян Павел ІІ у сакавіку 1983 г.
