Бронзавая скульптура, вырабленая ў натуральную велічыню, паказвае Хрыста ў вобразе бяздомнага, які спіць на лаўцы, прыкрыўшыся коўдрай, з босымі нагамі. На яго нагах бачныя раны ад цвікоў, якімі прыбівалі да крыжа Хрыста на Галгоце.
Пра гэта са спасылкай на партал Crux паведамляе rublev.com.
Скульптуру, усталяваную каля катэдральнай святыні буйнейшага мегаполіса Бразіліі, благаславіў кардынал Рыа-дэ-Жанейра Арані Тэмпеста.
Помнік быў адкрыты з нагоды Міжнароднага дня дапамогі бедным, які сёлета адзначаўся 19 лістапада.
«Гэта скульптура прымушае нас глядзець на тых, хто жыве на вуліцах нашага горада, як на братоў і сясцёр; папа Францішак звяртаецца да нас з заклікам бачыць Хрыста ў тых бедных людзях, якія жывуць на нашых вуліцах», — патлумачыў журналістам пробашч касцёла кс. Клаўдыё Сантас.
Скульптуру перадаў у дар арцыбіскупу Рыа-дэ-Жанейра канадскі мастак Цімаці Шмальц пры падтрымцы пасольства Бразіліі пры Святым Пасадзе і рыцараў Гроба Панскага.
Варта адзначыць, што падобная скульптура — не першая сярод прац Цімаці Шмальца.
Арыгінальны твор мастацтва быў усталяваны ў езуіцкім тэалагічным каледжы ў Таронта ў 2013 годзе. З таго часу копіі «Беспрытульнага Езуса» былі ўсталяваны ў Аўстраліі, на Кубе, у Індыі, Ірландыі, Іспаніі і ЗША.
У сакавіку 2016 года скульптуру ўсталявалі ва ўнутраным двары Сант Эджыніа ў Ватыкане (на фота ўверсе), ля ўвахода ў офісы Апостальскай службы сацыяльнага служэння.
Скульптар Цімаці Шмальц — практыкуючы католік і рэгулярна ў сваёй творчасці звяртаецца да рэлігійнай тэматыкі.
