У Вільні завяршылася сустрэча папы Францішка з Прэзідэнтам Літвы Даляй Грыбайскаўтэ. У сваёй прамове па выніках сустрэчы Пантыфік дзякаваў літоўцам за гасціннасць, згадваў няпростую гісторыю гэтай балтыйскай краіны і заверыў у заўсёднай падтрымцы з боку Святога Пасада.
У прыватнасці, аддаючы пашану рэлігійнай і нацыянальнай талерантнасці ў Літве, Святы Айцец пералічыў этнасы ў складзе Літоўскай Рэспублікі, не забыўшыся і пра беларусаў.
Літва як мост Камуніі і надзеі
«Распачынаю гэту пілігрымку ў балтыйскія краіны з Літвы, якая, згодна са словамі св. Яна Паўла ІІ, з’яўляецца “маўклівай сведкай рэлігійнай свабоды”.
Я хацеў бы прывітаць увесь літоўскі народ, які адчыняе сёння дзверы свайго дому. Да ўсіх вас скіроўваю сваю любоў і шчырую ўдзячнасць.
Гэты візіт адбываецца ў важны момант, калі літоўскі народ святкуе 100-годдзе незалежнасці. Гэта быў час, пазначаны шматлікім цярпеннем. Ваш народ мае моцную душу, якая зрабіла магчымым гэтае трыванне і адраджэнне.
На працягу сваёй гісторыі Літва яднала на сваёй тэрыторыі людзей розных этнасаў і рэлігій і вызначалася добразычлівасцю. Усе знайшлі на гэтых землях месца для жыцця: літоўцы, татары, палякі, рускія, беларусы, украінцы, армяне, немцы...; католікі, праваслаўныя, пратэстанты, стараверы, мусульмане, яўрэі.
Жылі разам у згодзе, ажно да прыходу сюды ідэалогіі таталітарызму, якая струшчыла здольнасць гасціннасці, сеячы недавер і сілу. Чэрпанне сілаў з мінулага – пашана да каранёў і падтрымка таго, што з’яўляецца сапраўдным і арыгінальным, – гэта дазволіла вам як народу развівацца і не згубіцца: талерантнасці, гасціннасці, павагі і салідарнасці».
Звяртаючыся да Прэзідэнта Літвы Далі Грыбаўскайтэ, Пантыфік дадаў:
«Запэўніваю Вас, што можаце разлічваць – як і дагэтуль – на падтрымку і супольную працу з Каталіцкім Касцёлам, каб ваша зямля магла выканаць сваё пакліканне і быць мастом еднасці і надзеі».
Кіраўнік Літоўскай Рэспублікі ў сваю чаргу назвала візіт Папы ў Літву «падарункам для літоўцаў».
«Мы ведаем, што людзі для Вас заўжды важнейшыя за юбілеі. І для нас вялікі гонар з боку Святога Пасаду мець гэтую падтрымку, якая з'яўляецца знакам падтрымкі нашай свабоды як народа.
Сустрэча з Вамі ўмацоўвае нашу веру і наш дух».
