Арыгінальная фігура Маці Божай Фацімскай будзе дастаўлена з партугальскага санктуарыя ў Панаму з нагоды Сусветных дзён моладзі, якія пройдуць у гэтай лацінаамерыканскай краіне ў 2019 г.
Скульптурная выява Найсвяцейшай Панны Марыі, створаная паводле сведчання сястры Лусіі душ Сантуш — адной з трох сведкаў аб’яўленняў Маці Божай у Фаціме ў 1917 г. — апошні раз пакідала Партугалію ў 2000 г. Дагэтуль яе перыгрынацыя праходзіла па 64-х краінах свету.
Даставіць арыгінальную фігуру ў Панаму было вырашана ў сувязі з тым, што вялікую пашану да Маці Божай Фацімскай меў св. Ян Павел ІІ — ініцыятар Сусветных дзён моладзі, — а таксама з прычыны шырокай распаўсюджанасці яе культа сярод панамскіх вернікаў, паведаміў арцыбіскуп Панамы Хасэ Дамінго Улоа Мэндзіета.
