Не менш за 19 асобаў загінула ў Нігерыі падчас нападу на касцёл. Сярод загінулых — два каталіцкія святары: кс. Джозэф Гор і кс. Фелікс Т’ёлаха.
Узброеная банда напала на мястэчка Аяр-Мбалом у штаце Бенуэ на паўднёвым усходзе Нігерыі. Бандыты спалілі больш за 35 дамоў і разрабавалі маёмасць жыхароў вёскі. Пра гэта паведамляе хрысціянскі мегапартал invictory.com са спасылкай на ТАСС і Daily Post.
Спачатку злачынцы ўварваліся ў касцёл св. Ігнацыя, дзе пачалі расстрэльваць людзей. Як паведаміў прадстаўнік паліцыі, па парафіянах адкрылі агонь а 5-й гадзіне раніцы падчас Імшы. Іншыя ахвяры загінулі падчас пахавання ў той самы дзень. Улады падазраюць, што напад здзейснілі пастухі-качэўнікі, якія варагуюць з аселымі земляробамі з-за зямельных надзелаў і водных рэсурсаў.
За апошнія два гады ў штаце Бенуэ больш за 300 чалавек загінулі ў падобных сутычках. Качэўнікі належаць да народнасці фульбэ і з’яўляюцца пераважна мусульманамі, а земляробы належаць да іншых этнічных групаў і пераважна вызнаюць хрысціянства.
