Пошук


05.03.2018 13:47   Паводле: ccee.eu / Фота: ccee.eu / Пераклад і адаптацыя: Мікола Гракаў / Catholic.by

З 28 лютага па 3 сакавіка ў сталіцы Албаніі Тыране праходзіў сход дэлегатаў, адказных за пакліканні пры Канферэнцыях Каталіцкіх Біскупаў Еўропы.

Каля пяцідзесяці ўдзельнікаў кангрэсу з 17 еўрапейскіх краінаў, якія ў гэтыя дні сабраліся ў сталіцы Албаніі па запрашэнні біскупа Лежы Атавіё Вітале, засяродзіліся на прыгажосці хрысціянскага паклікання. Іх сустрэча адбылася ў межах падрыхтоўкі да Сіноду Біскупаў на тэму «Моладзь, вера і распазнанне паклікання», які ў кастрычніку гэтага года пройдзе ў Рыме.

Падчас абмену думкамі на пленарных паседжаннях і ў працоўных групах дэлегаты мелі магчымасць яшчэ раз пераканацца ў багацці вопыту, напрацаванага разнастайнымі касцёльнымі структурамі ў сферы душпастырства пакліканняў, каб належным чынам адказаць на выклікі свету, які няспынна змяняецца. Разам з «традыцыцыйнымі» формамі душпастырства пакліканняў (малітоўныя сустрэчы, эўхарыстычная адарацыя, фармацыйныя летнікі, валанцёрская праца) шырока выкарыстоўваюцца і новыя (відэа, групы ў сацыяльных сетках і г.д.). Усе яны маюць адну мэту — паказаць прыгажосць паклікання да святарства і кансэкраванага жыцця.

«Бог для кожнага мае план жыцця! Сёння, як і раней, Хрыстус кліча мужчын і жанчын адгукнуцца на сваё асабістае Божае пакліканне».

Як адзначыў біскуп Оскар Кантоні, адказны за секцыю «EVS-Пакліканні» камісіі па справах моладзі Рады Канферэнцый Каталіцкіх Біскупаў Еўропы, створанай на пленарным пасяджэнні РКБЕ, якое адбылося ў 2017 г. у Мінску, «у душпастырстве пакліканняў мы не пачынаем з нуля, а маем дастаткова распрацаванае настаўніцтва Касцёла — плён багатага абмену вопытам у гэтай справе, назапашаным у розных еўрапейскіх краінах, таксама ў святле важнага дакумента, выдадзенага 20 гадоў таму: In Verbo tuo».

Менавіта на падставе гэтага ватыканскага дакумента а. Амедэо Чэнчыні, выкладчык Салезіянскага ўніверсітэта і Інстытута псіхалогіі Грыгарыянскага ўніверсітэта ў Рыме, даў аналіз становішча пакліканняў у Еўропе. Прадстаўленыя ім даныя сведчаць пра тое, што сёння было б некарэктна казаць пра крызіс пакліканняў у Еўропе, хоць сапраўды ў гэтай сферы назіраецца негатыўная тэндэнцыя як наступства распаўсюджанай ідэалогіі секулярызму. Яна закранае перадусім пакліканні, якія прынята лічыць «класічнымі»: святарства і кансэкраванае жыццё. Аднак разам з тым з’яўляюцца прыкметы як няспыннай плённасці гэтых пакліканняў, так і новых формаў кансэкраванага жыцця, якія сапраўды пашыраюць разуменне паклікання, кансэкрацыі і служэння.

Удзельнікі сустрэчы звярнулі ўвагу на неабходнасць узаемасувязі паміж душпастырствам пакліканняў і іншымі сферамі душпастырства, асабліва душпастырствам моладзі.

Дэлегаты таксама адзначылі ўсё больш глыбокае ўсведамленне таго, што за душпастырства пакліканняў нясе адказнасць уся хрысціянская супольнасць, а перадусім сям’я.

На кангрэсе былі абраныя намеснікі каардынатара секцыі «EVS-Пакліканні» пры камісіі РКБЕ: кс. Мікеле Джанола (Італія) і кс. Філіп Акур (Бельгія), якія разам з яе каардынатарам кс. Эмілем Парафінюком з Польшчы будуць накіроўваць яе дзейнасць на працягу бліжэйшага года.

Абноўлена 05.03.2018 15:57
Пры выкарыстанні матэрыялаў Catholic.by спасылка абавязковая. Калі ласка, азнаёмцеся з умовамі выкарыстання

Дарагія чытачы! Catholic.by — некамерцыйны праект, існуе за кошт ахвяраванняў і дабрачыннай дапамогі. Мы просім падтрымаць нашу дзейнасць. Ці будзе наш партал існаваць далей, у значнай ступені залежыць ад вас. Шчыра дзякуем за ахвярнасць, молімся за ўсіх, хто нас падтрымлівае.

. . . . . . . . . . . . . . . . . . . . . . . . . . . . . . . . . . . . . . . . . . . . . . . . . . . . . . . . . . . . .

Папа Францішак

Бог заўсёды чакае нас.
Ён ніколі не губляе надзеі і заўсёды прабывае побач.