Пра тое, як змагаюцца са стрэсам футбалісты, і пра сваю падрыхтоўку і перажыванне Вялікага посту расказаў у базыліцы Санкт-Эмерам (св. Эмерама) у Рэгенсбургу Міраслаў Клозэ.
Вядомы нямецкі футбаліст не толькі паспяховы бамбардзір, але і практыкуючы католік. На мінулым тыдні па запрашэнні адной з парафій у Рэгенсбургу ён выступіў у якасці госця з прывітальным словам да католікаў.
Пра сваю веру і сувязь з Касцёлам, закладзеную ў дзяцінстве, ён распавёў, выступаючы з прамовай да вернікаў перад Вялікім постам.
«У дзяцінстве я быў міністрантам і таксама калядаваў у маёй парафіі. Я, як і ўся мая сям’я, — веруючы католік. На Божае Нараджэнне са сваімі сябрамі я заўсёды ішоў калядаваць з дома ў дом (...) Вера ў Бога займае ў маім жыцці важнае месца», — прызнаўся Клозэ.
У сваім выступленні ён расказаў таксама пра духоўныя пытанні ў футболе і пра тое, як ён, прафесійны футбаліст, перажывае свае поспехі і няўдачы.
