У пачатку кожнага года ў Вашынгтоне адбываецца традыцыйны шматтысячны Марш за жыццё — мітынг супраць абортаў, які праводзіцца з нагоды рашэння суда ў 1973 года, у выніку якога ў ЗША былі легалізаваны аборты.
Вельмі важную ролю ў арганізацыі Марша адыгрывае моладзевая суполка «Студэнты за жыццё».
Сёлета да ўдзельнікаў Маршу з прывітальным словам праз спадарожнікавую сувязь звярнуўся прэзідэнт ЗША Дональд Трамп, а віцэ-прэзідэнт Майк Пенс асабіста сустрэўся з арганізатарамі і ўдзельнікамі мітынгу.
«Ведайце, што вашая любоў, вашая настойлівасць, вашая актыўнасць і малітвы ратуюць жыццё», — сказаў віцэ-прэзідэнт Пенс.
«Вось тут стаяць лідары арганізацый „Студэнтаў за жыццё“, якія прыйшлі з універсітэтаў і школаў па ўсёй краіне, якія кажуць праўду пра жыццё свайму пакаленню... Я шчыра веру, што з гэтым пакаленнем мы вернем святасць чалавечага жыцця ў цэнтр амерыканскага заканадаўства», — дадаў віцэ-прэзідэнт.
Тэма абортаў адыгрывае важную ролю ў грамадскім і палітычным жыцці Злучаных Штатаў Амерыкі. Апошнія дзесяцігоддзі супраць забойства дзяцей ва ўлонні маці выступае Рэспубліканская партыя, прадстаўнік якой перамог на прэзідэнцкіх выбарах у лістападзе 2016 года.
Паводле whitehouse.gov, lifenews.com, dailywire.com
