У Пуэрта-Мальданада ў Перу адбылася першая сустрэча Перадсінадальнай рады Сіноду Біскупаў для краін Амазоніі.
Пра пасяджэнне, якое прайшло 19–20 студзеня, праінфармаваў кардынал Клаўдыё Хуммес, стваральнік Пан-Амазонскай касцёльнай сеткі. У сустрэчы прынялі ўдзел біскупы з Балівіі, Бразіліі, Эквадора, Калумбіі, Перу, Сурынама, Венесуэлы, Гвіяны.
Яны гаварылі пра галоўныя праблемы, датычныя рэгіёну, і цяжкасці ў душпастырскай працы, а таксама пра грамадскую і экалагічную сітуацыю ў сваіх краінах.
Пасяджэнне Спецыяльнай асамблеі Сіноду Біскупаў, прысвечанае рэгіёну Пан-Амазонія, пройдзе ў кастрычніку 2019 года ў Ватыкане.
Папярэднія Спецыяльныя асамблеі былі прысвечаны Нідэрландам (1980 г.), Еўропе (1991 г. і 1999 г.), Афрыцы (1994 г. і 2009 г.), Лівану (1995 г.), Амерыцы (1997 г.), Азіі (1998 г.), Акіяніі (1998 г.) і Блізкаму Усходу (2010 г.).
