13 снежня Папа Францішак прызначыў чатырох членаў XVI Звычайнай Рады Генеральнага сакратарыята Сіноду Біскупаў.
Як паведаміла Беларуская рэдакцыя парталу Vatican News, яны будуць браць удзел ў рэалізацыі рашэнняў апошняга сінадальнага сходу і рыхтаваць наступную Асамблею.
Членамі Рады, прызначанымі Пантыфікам, сталі кардынал Жан-Клод Ольрыш, арцыбіскуп Люксембуржскі; кардынал Рабэрто Рэполе, арцыбіскуп Турынскі; сястра Сымона Брамбіла, сакратар Дыкастэрыі па справах інстытутаў кансэкраванага жыцця і таварыстваў апостальскага жыцця, а таксама свецкая верніца Марыя Лія Дзэрвіна, член Дыкастэрыі па справах біскупаў.
Звычайная Рада Генеральнага сакратарыята Сіноду Біскупаў складаецца з сямнаццаці чалавек.
Дванаццаць членаў былі выбраныя ўдзельнікамі сінадальнага сходу, які праходзіў у кастрычніку 2024 года ў Ватыкане. Сярод іх па адным прадстаўніку ад Усходніх Цэркваў і Акіяніі, а таксаама па два прадстаўнікі ад Паўночнай Амерыкі, Лацінскай Амерыкі, Еўропы, Афрыкі і Азіі. Кіраўніком Звычайнай Рады Генеральнага сакратарыята Сіноду Біскупаў з’яўляецца сам Папа.
