Пяць гадоў таму ў твітары з’явіўся профіль @Pontifex, які сёння чытаюць 43 мільёны карыстальнікаў. Сярод дзевяці моўных версій найчасцей папскія твіты чытаюць па-іспанску і па-англійску (па 15, 5 млн чытачоў).
На трэцім месцы — італьянская версія старонкі (4, 8 млн чытачоў), затым — партугальская (3, 4 млн) і французская (1 млн). За твітамі Пантыфіка па-польску сочаць 996 тысяч карыстальнікаў, па-лацінску — 856 тысяч, па-нямецку — 570 тысяч, па-арабску — 398 тысяч.
Акаўнт у твітары 12 снежня 2012 года пачаў весці папа Бэнэдыкт XVI. Першы твіт змяшчаў наступныя словы: «Шаноўныя сябры! З радасцю яднаюся з вамі ў твітары. Дзякую за прыгожыя адказы і ад усяго сэрца благаслаўляю».
У сакавіку 2013 г. пасля абрання Пантыфікам папа Францішак пераняў акаўнт @Pontifex. Апошні яго допіс за 11 снежня паведамляе: «Палітычная дзейнасць павінна сапраўды стаць на службу чалавечай асобы, супольнага дабра і абароны стварэння».
