Святы Пасад ініцыяваў кампанію ў папулярных сацыяльных сетках Facebook і Instagram, прысвечаную пятай гадавіне з часу публікацыі Апостальскай адгартацыі Папы Францішка Christus Vivit («Хрыстус жыве»), напісанай у форме ліста да моладзі.
«Аб’яднаць маладых людзей з усяго свету ў дванаццацітыднёвым досведзе абмену сучасным сэнсам і духам Christus Vivit, а таксама плёнам нядаўніх Сусветных дзён моладзі ў Лісабоне ў 2023 годзе», — такая мэта праекта, які стартаваў пад эгідай Дыкастэрыі па справах свецкіх, сям’і і жыцця.
Як нагадвае Беларуская рэдакцыя парталу Vatican News, адгартацыя Christus Vivit была выдадзена пасля Сіноду Біскупаў на тэму моладзі.
Кампанія будзе працягвацца да 25 красавіка. У яе межах прадставяць матэрыялы, якія, як мяркуецца, паспрыяюць паглыбленню досведу папярэдніх касцёльных сустрэч, звязаных з моладдзю.
Яны з’явяцца на некалькіх еўрапейскіх мовах.
Тэксты падрыхтавала група, якая ўдзельнічае ў праграме Дыкастэрыі па камунікацыі пад назвай «Камунікацыя веры ў лічбавым свеце». Яна аб’ядноўвае маладых людзей, якія падчас серыі анлайн і вочных сустрэч і семінараў набываюць каштоўныя навыкі лічбавай камунікацыі з пункту гледжання духоўнай адукацыі, а таксама ўдзельнічаюць у праектах шэрагу ватыканскіх структур.
