Выстаўка кумранскіх рукапісаў, запланаваная ў 2019 годзе ў музеі Бібліі ў Франкфурце-на-Майне, можа не адбыцца. Упраўленне старажытнасцяў Ізраіля адмовіла ў наданні дазволу на вываз манускрыптаў з краіны, паколькі ўрад Германіі адмаўляецца прызнаць рукапіс уласнасцю ізраільскай дзяржавы.
На старажытныя яўрэйскія рукапісы на сёння прэтэндуюць Іарданія і Палесціна (Палесцінская аўтаномія).
Віцэ-мэр Франкфурта-на-Майне Уве Бэкер выказаў абурэнне такой пазіцыяй нямецкіх урадаўцаў: «Калі Германія не хоча прызнаваць прававы статус кумранскіх рукапісаў як аб’екта сусветнай культурнай спадчыны Ізраіля, гэта драматычна змяняе каардынаты нямецка-ізраільскіх адносін».
На думку Бэкера, такімі паводзінамі Германія шкодзіць адносінам з хрысціянамі Блізкага Усходу.
Кумранскія рукапісы — сувоі (назвы знойдзеных манускрыптаў) Мёртвага мора, знойдзеныя ў 1947 годзе і датаваныя ад 250 г. да н.э. і да 68 г. пасля н.э. Гэтая знаходка зрабіла сенсацыю ў біблійным свеце.
